Dźěłaja dale na nowej homepage

Montag, 30. Dezember 2019 geschrieben von:

Towarstwo Serbski kulturny turizm (SKT) móže na wuspěšne lěto 2019 zhladować. Tak je na swojej lětsa do jutrow zaměst­njenej facebookowej stronje dotal­ 1 800 fanow docpěł.

Budyšin (SN/mwe). „Na podawki bohate lěto leži za nami. Jako předsyda towarstwa Serb­skeho kulturneho turizma dźakuju so partneram a sobuakteram předewzaćow na polu turizma za podpěru wšitkich našich­ projektow“, praji referent w Bu­dyskim Domowinskim zarjedźe Pětr Brězan.­

Słyšće powěsć přewšo krasnu ...

Montag, 30. Dezember 2019 geschrieben von:

Chór Lipa tradicionalny hodowny nyšpor w Róžeńčanskej swjatnicy wotměł

Róžant (JK/SN). Hodowne wjeselo a rjane dary sej z potrěbnymi dźělić, je dobra a spomóžna mysl. Hodowny nyšpor, kotryž chór Lipa hižo njeličomne lěta w Róžeńčanskej hnadownej cyrkwi wuhotuje, bě lětsa zaso wulkotne zakónčenje hodownych swjatych dnjow a zdobom krónowanje swjedźenja swjateje swójby.

W Choćebuzu domiznu našoł

Freitag, 27. Dezember 2019 geschrieben von:

„Jandźel“ jemu rěkaja, štož we wěstym nastupanju tež trjechi. Młody muž z prawym mjenom Robert Engel wukonja w projektowej towaršnosći Domowiny w Delnjej Łužicy Dompro wažnu funk­ci­ju projektoweho koordinatora. Jeho na­dawk­ je akterow na wsach wuswobodźić ze wšeje spěchowanskeje běrokratije a so sam wo nju starać. Tójšto wědy je sej studo­wany hospodarski matematikar a wukubłany kulturny manager hižo při­swojił, zo njeby formulary respektiwnje próstwy wo spěchowanje projektow jenož prawje wupjelnił, ale je tež tak přeswědčiwje formulował,­ zo je wuspěch nima­le wěsty. „Wobžaruju, hdyž podpěra na formulaciji zwrěšći“, 35lětny Choćebužan přiznawa. Tohodla rěči z ludźimi, kotřiž wo při­zwolenju pjenježneje projektoweje pomocy rozsudźeja. Spyta po­dobnje myslić kaž woni, próstwy tak napi­sać, zo so někak tomu runaja, štož adresaća woča­kuja.

Zajimcam klětu dalše poskitki towarstwa Škit

Freitag, 27. Dezember 2019 geschrieben von:

Hrubjelčicy (scu/SN). Na prěnju hłownu zhromadźiznu jako zapisane towarstwo zetkachu so čłonojo Škit z.t. póndźelu do patoržicy w Hrubjelčicach. Předsyda towarstwa Robert Krawc je pozitiwnje na dźěławosć cyłka w lěće 2019 zhladował. Serbskorěčne podawki w Budyšinje organizować a přewjesć steješe wosebje w srjedźišću. Tak wotměchu serbski kulturny wječork na Byrgarskej zahrodźe Serbskeho ludoweho ansambla składnostnje staroměšćanskeho festiwala. Dale­ wuhotowachu poslednju staciju bičwolejbuloweje­ tury Radija Satkule w Sprjewinej kupjeli. Finalny turněr w Miłoćicach dobychu čłonojo wolejbuloweho wotrjada Škita po 2016 druhi raz. Škit wobhospodarješe zahrodu w starym měsće, kotruž chcedźa šulerjam we wobłuku cyłodnjowskeho poskitka wote­wrić a jim serbske pomjenowanja rostlinow zbližić. W decembrje jimaše towarstwo mnohich ludźi ze serbsko-němskim adwentnym spěwanjom na hłownym torhošću. Čłonojo parowachu serbske poskitki na Wjacławskich wikach, tuž chcedźa nětko kóždolětnje na zhroma­dne spěwanje přeprosyć.

Gratulacija z třomi ćežišćemi

Montag, 23. Dezember 2019 geschrieben von:

Budyšin (SN/at). Serbski třěšny zwjazk chce noweho knježerstwoweho społnomócnjeneho za naležnosće Serbow w Braniborskej, statneho sekretara Tobiasa Dünowa (SPD), podpěrać, kaž z gratulaciskeho spisa předsydy Domowiny Dawida Statnika wuchadźa. Wón Dünowa zdobom přeproša, serbske zarjadnišća we Łužicy wopytać a so z nimi a jich akterami zeznajomić.

Tři aktualne wužadanja formuluje Statnik za zhromadne dźěło z nowym społnomócnjenym a z Braniborskej. Wuchadźišćo za to, rosćacy wobjim nadawkow na polu rěčneho spěchowanja tež zmištrować, je dołhodobny a spušćomny financny zakład. „Koaliciske zrěčenje z předwidźanym zwyšenjom přiražkow Załožbje za serbski lud běži do praweho směra“, rěka w zdźělence Domowiny. W zwisku ze strukturnej změnu „skići so z našeho wida historiska šansa, z re­gionalnej kulturno-rěčnej nadhódnotu přidatnje identitu tworjacu perspektiwu za region wutworić“. Třeći dypk měri so na to, polěpšić wuměnjenja w kubłanskim wobłuku, štož mjenuje Statnik „wažnu potrěbnosć Serbow“.

Župa z nowymi mjezwočemi

Montag, 23. Dezember 2019 geschrieben von:

Nowa Wjeska (ddy/SN). Předsydstwo župy „Jan Skala“ – Zwjazka serbskich stu­dowacych je so sobotu w Nowej Wjesce zešło, zo by na aktiwity w nachilacym so lěće zhladowało a wažny rozsud na čole swojeho cyłka rozjimało. W srjedźišću steješe přichod zwjazka.

Dotalny župan Damian Dyrlich, kiž mjeztym jako wučer dźěła, je swoje nadaw­ki młódšimaj přepodał. Wotnětka starataj so Fabian Hejduška a Matej Mark zhromadnje wo naležnosće župana. Změniło je so tež nawod­nistwo studentskeho chóra. Symana Hejdušku naslě­dujetaj Michał Donat a Thea Čórlichec, kotrajž mataj nětko zamołwitosć za tele ćěleso. Dyrlich kaž Hejduška chcetaj swojich naslědnikow podpěrać a wjeselitaj so, zo je přichod z nowymi mjezwočemi w serbskim studentskim skutkowanju zaručeny. Studenća wuhódnoćichu tež lětušu schadźowanku. Tak móžachu zwěsćić, zo běše wona hižo wjele lěpje orga­nizowana hač loni. Mjeńše njedostatki zamołwitym zapodadźa. Runje tak chcedźa so dale wo połne dźěłowe městno koordinatora za młodźinu pola Domowiny prócować.

Zamołwitosće sej dale wědomi

Montag, 23. Dezember 2019 geschrieben von:

Smjerdźaca (aha/SN). Gabriel Krawc wostanje předsyda Smjerdźečanskeje rejwanskeje skupiny. Wjac hač 60 přitomnych čłonow je jemu na pjatkownej tradicionalnej adwentničce, kotraž bě zdobom hłowna a wólbna zhromadźizna, w Smjerdźečanskim kulturnym domje dowěru wuprajiło. Jeho zastupjer je Stefan Cuška, protokolantka a chronikarka je Antonija Wałdźina, zastojnstwo pokładnika wukonja Beno Jurk.

Hórčenjo rjane dohodowne dožiwjenje měli

Montag, 23. Dezember 2019 geschrieben von:

Hórki (KJu/SN). Hižo štwórty króć bě Hórčanske wjesne towarstwo „Při skale“ wjesnjanow a hosći zbliska a zdaloka, wosebje swójby, na wčerawše adwentne wiki při a do gratownje wohnjoweje wobory witało. Wjac hač 150 ludźi přichwata a dožiwi rjane dohodowne popołdnjo w zhromadnosći. Dźěći zwjeselichu so nad wopytom rumpodicha. Kóždy z holcow a hólcow měješe składnosć, jemu baseń abo spěw před­njesć. Wopytowarjo zhromadnje tohorunja někotre hodowne pěsnje zaspěwachu. Po tym su dujerjo wokoło Hórčana Jurja Hejduški wšitkich zawjeselili.

Imiša w Hodźiju wopominali

Dienstag, 17. Dezember 2019 geschrieben von:
Na serbskeho wótčinca, fararja dr. Jaroměra Hendricha Imiša, stej wosada Hodźij a tamniše domizniske towarstwo minjenu sobotu składnostnje jeho wčerawšich 200. narodnin w Hodźijskim kantoraće spominałoj. Dr. Gerhard Krawc (stejo) z Delnjeho Wunjowa přednošowaše wo žiwjenju a skutkowanju wuznamneho Serba. Imiš njena­by mjeno jenož jako farar w Hodźiju, ale bě angažowany wučenc a jedyn ze załožerjow Maćicy Serbskeje. Farar Christoph Rummel rozłoži přitomnym twarske saně­rowanje a nowowuhotowanje Hodźijskeje cyrkwje, kotrež bě Imiš nastorčił. Z nje­dźelnymi kemšemi w Hodźiju stej wosada a Serbske ewangelske towarstwo jeho­ wopomi­nałoj, prědował je superintendent Jan Malink. Foto: SN/Hanka Šěnec

Serbski sejm lěto skutkuje

Dienstag, 17. Dezember 2019 geschrieben von:

Slepo (SN/at). W Slepom bě so Serbski sejm loni w nowembrje skonstituował, tam wotmě so minjenu sobotu tež jeho poslednje wuradźowanje prěnjeho dospołneho dźěłoweho lěta. Slepjanski wjesnjanosta Reinhard Bork (njestronjan) zhladowaše w swojich witanskich słowach zdobom na prócowanja, posrědkować dźěćom a młodostnym serbšćinu. Tak rozprawješe wo bytostnym wobjimje přez gmejnsku mjezu derje přiwzateho serbskorěčneho kubłanja na zakładźe projekta Witaj a koncepcije 2plus. K tomu přinošuje čestnohamtski a gmejnski angažement za šulerski transport, kotryž statna strona dosahajcy njezawěsća.

Kaž Serbski sejm w nowinskej zdźělence infor­muje, zhonichu přitomni dale wo žiwych serbskich towarstwowych aktiwitach w gmejnje. Na nje je wjesnjanosta Bork jara hordy.

„Jedne lěto Serbski sejm a přichod“ rěka­ hesło informaciskeho zarjadowanja štwórtk, 6. februara 2020, w Njebjelčicach. Zajimcy móža so tam wo skutkowanju sejma wobhonić a so k tomu wuprajić. Po­dobne zarjadowanje přihotuja za Delnju Łužicu, termin hišće wozjewja.

Serbska debata

Neuheiten LND