Lajska dźiwadłowa skupina towarstwa Bratrowstwo předstaji na swojim lětnym swjedźenju sobotu wječor prěni raz nowy kruch „Hdyž kokula woła“ w Sulšečanskim kulturnym domje.

Sulšecy (SN/CoR). Za prěni tydźeń noweho lěta su sej dźiwadłowi amaterojo Bratrowstwa tójšto předewzali. Kruty probowy plan postaja protyku štyrnaće sobuskutkowacych na a za jewišćom, zo by so sobotna premjera derje radźiła. Čas do hód a mjez lětomaj bě z hinašimi wěcami pjelnjeny a prawidłowne proby lědma móžne. Akterojo dyrbja so tuž nětko ćim bóle prócować, wšako maja jenož hišće tři dny zwučowanja.

Jewišćowy wobraz, kotryž ma Enrico Langa na starosći, bě nimale hotowy, jako so čłonojo skupiny wčera w Sulšečanskim kulturnym domje zetkachu. Tu a tam ma so hišće něšto wudospołnić, a hižo je burska dobra stwa přihotowana za podawki, kotrež maja so w swójbje bura Symana Wornarja wothrawać. Ze sprawnosću ma sej wón tróšku ćežko, a to chce stary Hajnk na šibałe wašnje změnić. Je sej tuž mału hru wumyslił, a w njej dźe tež wo to, što so z ludźimi stanje, hdyž jim wulke namrěwstwo kiwa – w najlěpšim padźe komedija.

Hižo zahe za přirodu a wědomosć so zajimował

Mittwoch, 06. Januar 2016 geschrieben von:

Zrudźaca powěsć je so po Łužicy rozšě­riła, zo bě 1. januara w Choćebuzu-Škodowje w starobje 88 lět zemrěł serbski wučer na wuměnku, wuběrny přełožowar literatury, basnik a spěwar-bariton Alfred Měškank.

Načasna forma reje skutkowała

Dienstag, 05. Januar 2016 geschrieben von:

Serbski folklorny ansambl Wudwor (SFAW) ma wot lońšeho februara noweho předsydu. Stanij Handrik je ze swojim młodym mustwom tójšto zdokonjał a zhladuje nadźijepołny do přichoda.

Wudwor (SN/MiR). Wosebje zwjeselace je, zo maja Wudworčenjo zaso dorostowu skupinu, kotruž Měrćin Handrik ze Serbskich Pazlic nawjeduje. Za wjeršk lońšeho skutkowanja Wudworčanow ma Stanij Handrik. Mjezynarodny folklorny festiwal „Łužica 2015“. „Tam smy prěni króć swoju nowu polonezu předstajili. Trochu skrótšena, načasniša forma je so wjetšinje přihladowarjow lubiła. Spěwarjo-Přezpólni njeběchu jim jenož na festiwalu wustojni partnerojo; woni słušeja do kruteho cyłka SFAW. Cyle krótkodobnje běchu so čłonojo SFAW rozsudźili, podać so w awgusće na folklorny festiwal swjateho Istvána w rumunskim měsće Kolozsvár/Cluj-Napoca. Předewzaće podpěrałoj stej Domowina a Załožba za serbski lud. „Rady bychmy sej tam wospjet dojěli. Wšako smy dobre zwiski wosebje k madźarskej mjeńšinje nawjazali“, Stanij Handrik powěda.

Zmužitosć a wizije SŠT

Dienstag, 29. Dezember 2015 geschrieben von:

Budyšin (SN/MiR). Serbske šulske towarstwo hotuje so na swjedźeń 25lětneho wobstaća. 23. januara wotměje so kubłanska a wučerska schadźowanka čłonow a hosći SŠT w Haslowje. Na róčnicu załoženja 5. januara pak přeproša předsydstwo podpěraćelow, přećelow, politikarjow a zajimcow do Budyskeho Serbskeho domu na přijeće. K jubilejej wuda towarstwo nowu publikaciju swo­jeje dźěławosće pod titlom „Wo přiswojenju serbšćiny a němčiny“ – 25 lět Serbske šulske towarstwo z.t.“, kotruž chce předsydka SŠT Ludmila Budarjowa tón dźeń žurnalistam předstajić.

W nowostce hraje dotalne skutkowanje šulskeho towarstwa runje tak wulku rólu kaž ličby a fakty wo wu­wi­ću projekta Witaj, kotryž bu na iniciatiwu towarstwa w Serbach zawjedźeny. Wažnu rólu hraje dale analyza skutko­wanja koncepcije 2plus na serbskich a dwurěčnych šulach Łužicy. Při tym za­běra rozklučowanje po wotpowědnych třoch rěčnych skupinach wuznamne městno. Sformulowane su tež wizije, kotrež mějachu čłonojo při załoženju SŠT, a staw jich zwoprawdźenja. Za to trjebachu wjele mocy.

„Serbske lěto“ pola Němcow w Danskej

Montag, 21. Dezember 2015 geschrieben von:

Zwjazk němskich Sewjeroschleswigčanow (BDN) planuje, klětu přewjesć „serbske lěto“ w južnej Danskej. Jeho přihot leži hłownje w rukomaj Kristin Heelemanec, studentki kultury a managementa a předsydki Pawka.

Aabenraa (SN/smi). Cyłe lěto chce so mjeńšina Němcow w Danskej klětu ze Serbami zaběrać. Prěnjotnje běše jenož wustajeńca w kooperaciji mjez Němskim muzejom w Danskej a Serbskim muzejom w Budyšinje planowana. Z toho pak wuwi so myslička wjetšeho razu. Kristin Heelemanec, předsydka młodźinskeho towarstwa Pawk, pomha ju we wobłuku praktikuma pola BDN zwoprawdźić.

Rěčne koło klětu dale wjedu

Donnerstag, 17. Dezember 2015 geschrieben von:

Wojerecy (SN/at). Na lětsa zdokonjane zhladowali a wo klětušich předewzaćach dorozumili su so čłonojo předsydstwa župy „Handrij Zejler“ wčera we Wojerowskim Domowinskim domje.

Kaž regionalna rěčnica Domowiny ­za Wojerowski region Christina Šołćina na naprašowanje zdźěli, běchu projekty za wučbu serbšćiny w měrcu k tomu přinošowali, zo su so šulerjo Krabatoweje zakładneje šule w Kulowje, Lessingoweho gymnazija kaž tež spěchowanskeje šule za zbrašenych we Wojerecach z rěču, kulturu, tradicijemi a nałožkami našeho ludu bliže zaběrali.

Ze swójskim projektom wobrubichu spočatk septembra wotkryće wobnowjeneje wopomjatneje tafle na załoženskim domje Domowiny we wobłuku přepo­daća Wobydlerskeho centruma Piwarska hasa 1. Při tej składnosći wuprajene přeće, zo njech tule serbska kultura swoje městno nańdźe, chcedźa klětu zwoprawdźić. „Planujemy 23. oktobra 2016 nazymski koncert z Přezpólnymi. Woni chcedźa pěsnje ze Smolerjoweje zběrki spěwać“, wuswětli Christina Šołćina.

Nadawki hišće lěpje spjelnjeć

Dienstag, 15. Dezember 2015 geschrieben von:

Nowowuzwolene předsydstwo Kamjenskeje župy chce swoje nadawki hišće lěpje spjelnjeć. Za to je na swojim wčerawšim prěnim zetkanju po wólbach štyri wuběrki wutworiło.

Chrósćicy (KJu/SN). Předsydstwo Kamjenskeje župy „Michał Hórnik“ je so wčera w Chrósćicach skonstituowało. Nowa županka Zala Cyžowa wuradźowanje nawjedowaše. Za jeje naměstnicu wuzwolichu čłonojo gremija Hórčanku Katharinu Jurkowu, kotraž skutkuje hłow­nohamtsce jako regionalna rěčnica w župje a tak nadawki regionalneho zwjazka a jeho projekty derje znaje.

Bilanca a wuhlad na nowe projekty

Montag, 14. Dezember 2015 geschrieben von:

Přijomna to adwentnička, na kotruž bě ZSW swojich čłonow minjeny pjatk do Haslowskeho hosćenca přeprosył. Jeho předsyda István Kobjela wužiwaše składnosć a poda krótku bilancu dźěławosće nachilaceho so lěta 2015.

Haslow (AW/SN). „Smy tójšto zdokonjeli a ke kulturnemu žiwjenju hódnje přinošowali“, předsyda ZSW wuzběhny. Z čitanjemi w pěstowarnjach, šulach, Domowinskich skupinach Hornjeje a Delnjeje Łužicy spřistupnichmy zjawnosći serbsku literaturu. Z diskusijnym wječorom ze syriskim basnikom a lěkarjom dr. Abdelwahhabom Azzawijom w Budyšinje kaž tež z čitanjom z nim a jeho bratrom w Drježdźanskim literarnym domje Villa Augustin, kotrejž organizowaše čłon předsydstwa ZSW a předsyda Koła serbskich spisowaćelow Benedikt Dyrlich, zarjadowa so towarstwo sobu do solidaritneho hibanja na dobro ćěkancow.

Přihoty na reformaciski jubilej

Montag, 14. Dezember 2015 geschrieben von:

Towarstwo za serbsku rěč w cyrkwi z.t. wotmě njedawno swoju hłownu zhromadźiznu. Tam předźěłachu wustawki, wuzwolichu nowe předsydstwo a přihotowachu nowe projekty.

Choćebuz. Nimo čłonow towarstwa su tež někotři hosćo na zhromadźiznu přichwatali, mjez nimi předsyda Serbskeho ewangelskeho towarstwa z Hornjeje Łužicy Měrćin Wirth.

Předsyda Uwe Gutšmit z Bórkowow a serbski dušepastyr Ingolf Kśenka z Janšojc rozkładźeštaj ćežišća swojich prócowanjow. Kśenka podšmórny wosebje wulki woznam lětušeho Łužiskeho cyrwinskeho dnja, kotryž bě so 4. julija w Choćebuzu wotměł. Wón měnješe, zo bě to tež za serbskich křesćanow wjeršk.

W diskusiji wuzběhnychu wobdźělnicy zhromadźizny podpěru cyrkwinskeho wjednistwa. Ćežišćo diskusije běchu projekty přichodnych lět. Najwažniše předewzaće je wutworić Zwjazk serbskich křesćanow w ewangelskej cyrkwi, kotryž ma dwurěčny charakter łužiskich wosadow skrućić a podpěrać. Jako přihot planuje towarstwo wudawać serbske cyrkwinske łopjeno z mjenom „Nowy wósadnik“. Prěnje čisło je hižo k hodam předwidźane.

Z počesćenjom

Freitag, 11. Dezember 2015 geschrieben von:

Budyšin (kl/SN). Wobdźělnicy kónclětneho zarjadowanja župy „Jan Arnošt Smoler“ su wčera w Budyskim Serbskim domje lětuše skutkowanje bilancowali.

Předsyda Domowiny Dawid Statnik počesći nawodnicu Malešanskeje Witaj-pěstowarnje Borboru Kralowu z Čestnym znamješkom Domowiny. Ze swojim dźěłom wona prinicip dwurěčnosće a nawuknjenja serbšćiny mjez dźěćimi dale wuwiwa. Programy dźěći w serbskej rěči a drasće ewangelskich Serbow su w gmejnskim žiwjenju stajny wjeršk.

Po zhladowanju na lětuše aktiwity a projekty w župje stejachu klětuše předewzaća w srjedźišću. We wobłuku wopominanja Jana Arnošta Smolerja składnostnje jeho 200. narodnin organizuje župa 3. měrca počesćenje při Smolerjowym pomniku w Budyšinje. Projektowy dźeń župow Budyšin, Kamjenc a Wojerecy za šulerjow B-serbšćiny w Hornim Hajnku je na 100. posmjertne narodniny Jurja Brězana wusměrjeny.

Šulerjo Radworskeje Serbskeje wyšeje šule z wučerku Walburgu Sćapanowej zanjesechu hodowne pěsnje a předstajichu nałožk a drastu swjateje Borbory.

Anzeige