Choćebuz (SN/JaW). Čłonojo Zwjazkoweho předsydstwa Domowiny njewola zastupnikow Serbow za wólby Rady za serbske naležnosće Sakskeje kaž planowane hakle 29. nowembra, ale hižo 30. oktobra w Budyskim Serbskim domje. To je zwjazkowe předsydstwo minjeny pjatk w Choćebuzu po turbulentnym rozjimanju naležnosće wobzamknyło.
Wustajeńca Budyskeho Serbskeho muzeja „Serbske cyrkwje mjez Lubijom a Luborazom“ je nětko tež we Wendlandźe přistupna.
Łuchow (WS/SN). W katolskej cyrkwi swj. Hańže we wendlandskim měsće Łuchowje (Lüchow) su minjeny pjatk pućowansku wustajeńcu Budyskeho Serbskeho muzeja „Serbske cyrkwje mjez Lubijom a Luborazom“ wotewrěli.
Nošer projekta je hakle loni załožene asociěrowane towarstwo Domowiny Wendischer Freundes- und Arbeitskreis. Wustajeńca je přinošk k 50. róčnicy załoženja třoch domiznowědnych towarstwow we Wendlandźe, kotrež swjećachu samsny dźeń w kulowcu Lübeln swój jubilej. Hač do 19. oktobra we Łuchowje přistupna přehladka je zdobom dalši zhromadny projekt kulturneje wuměny mjez Serbami a Wendlandom z pomocu města Łuchowa. Zhromadne skutkowanje wobeju partnerow traje mjeztym 28 lět.
Předsydstwje Maśicy a Maćicy Serbskeje stej so ze skutkowanjom młodeho delnjoserbskeho kulturneho towarstwa zeznajomiłoj a so na nowe towarstwowe logo dojednałoj.
Choćebuz (JŁu/SN). Předsydstwje Maćicy a Maśicy Serbskeje stej so wčera w Choćebuskim Serbskim domje z dźěławosću noweho delnjoserbskeho kulturneho towarstwa Studnja zeznajomiłoj. Wo tym informuje předsyda Maćicy Serbskeje Jurij Łušćanski. „Tradicionelnje wuradźujetej předsydstwje jónu wob lěto zwonka Budyšina, zo byštej sej skutkowanje regionalnych towarstwow zbližiłoj“, Jurij Łušćanski wuswětli.
Drježdźany (SN). Pod hesłom „Wuměłstwo na chódbje“ wuhotuje sakske ministerstwo za wědomosć a wuměłstwo prawidłowne wustajeńcy „w mjeńšim ramiku“ tydyšich resp. wottud pochadźacych molerjow, grafikarjow a fotografow. Na wopyće statneho sekretara Uwy Gaula pola Serbow loni w Budyskim Serbskim domje běchu ideju zrodźili, předstajić w tym wobłuku tež serbske tworjace wuměłstwo. Z podpěru Zwjazka serbskich wuměłcow (ZSW) su w minjenych měsacach přihotowali prezentaciju tuchwilu w Berlinje bydlaceje a skutkowaceje čłonki towarstwa Měrki Pawlikoweje. Přehladka wopřijima dohromady sydom mólbow kaž tež žiwjenjoběh wuměłče.
Jutře, srjedu, w 11 hodź. budźe w přitomnosći Měrki Pawlikoweje kaž tež mjez druhim předsydy ZSW Jana Bělka drje njeoficialne, ale přiwšěm zjawne wotewrjenje wustajeńcy, kotrež je na chódbje běrowow amtěrowaceje ministerki dr. Evy-Marije Stange (SPD) a jeje sobudźěłaćerjow zaměstnjena. Mała ekspozicija wostanje potom hač do kónca lěta přistupna.
Choćebuz (SN/JaW). Zwjazkowe předsydstwo Domowiny je pjatk w Choćebuzu wěcywustojnych wobydlerjow do dźěłoweho kruha za serbske naležnosće wokrjesa Budyšin wuzwoliło. Gremij skutkuje čestnohamtsce na dobu 2019 do 2024.
W přihotach na tajne wólby kritizowaše Marka Cyžowa, zo je mjez namjetowanymi dźewjeć kandidatami tež zastupnik Serbskeho sejma. „Mi so njelubi, zo steji na lisćinje kandidatow pod logom Domowiny sejmar. Wšitcy znajemy diskusije“, wona zwurazni. Předsyda Domowiny znapřećiwi, zo smědźa wšitke cyłki, skupiny a towarstwa, tež Serbski sejm, kandidatow namjetować. „Nimo toho smy so dojednali, zo smy wotewrjeni wšitkim napřećo, kiž chcedźa z nami dźěłać. Hdyž Serbski sejm w naležnosći našu kompetencu akceptuje a podpěruje, a so zarjaduje do zajimcow, kiž nam namjety zapodaja, je to w porjadku. Smy zjawnje namołwjeli namjety zapodać. Mamy tuž z tym ličić, zo tež ludźo reaguja, kotřiž su w jednotliwych naležnosćach hinašeho měnjenja“, Statnik podšmórny.
Na swójbne popołdnjo a dworowy swjedźeń do Wuježka běštej kónc tydźenja Krygarjec swójba a Serbske ewangelske towarstwo přeprosyłoj. Hižo 15. króć su Serbja, ewangelscy kaž tež katolscy, poskitk dźakownje přiwzali.
Wuježk (lm/SN). Dokelž maja młode swójby termin po lětnich prózdninach kruće zaplanowany, poda so něhdźe 40 zajimcow, přewažnje dźěći, sobotu po wobjedźe do přirody wokoło Wuježka. Pućowanje wjedźeše přez lěs na Rubježny hród. Po puću knježeštej čiła bjesada a wuměna, wšako běchu hosćo ze wšěch kóncow Łužicy kaž tež z Lipska a Bayerskeho lěsa přichwatali. Přiroda skićeše dźěćom dosć městna so wucychnować a dorosćenym so wočerstwić, tak zo dachu sej na kóncu swačinu na Pawlikec dworje we Wuježku zesłodźeć.
Smjerdźaca (aha/SN). W Serbskim kubłanskim srjedźišću LIPA w Smjerdźacej je so spočatk tydźenja nazymski semester zahajił. Dotal předleži 250 přizjewjenjow. Do toho je LIPA zdźěłała flajer z dohromady 60 poskitkami, wusměrjenymi na wšitke starobne skupiny. Za dźěći a młode swójby su to swójbny adwentny kónc tydźenja w Smochćicach, sportowej lěhwje w lětnich prózdninach, rejwanje z dźěćimi, dźěćacej kursaj za nawuknjenje šića kaž tež maćerno-dźěćacy kruh.
W kursu za wukubłanje mentorkow wukubłuje Claudia Winarjowa pěstowarki na poradźowarki praktikantow. Požadane kursy, kaž stej to na přikład tykanje sačkow abo wušiwanje narodneje drasty, LIPA wospjet přewjeduje. Sportowe a strowotniske kursy su tohorunja jara požadane a sahaja wot callanetici, pilates a yoga hač k rjap skrućacej gymnastice.
Tónle kónc tydźenja wotměje so w Riesy lětuši Dźeń Saksow. Serbske kulturne a dalše ćělesa pak tež tónraz pódla njebudu.
Riesa (SN/JaW). Lětuši 27. dźeń Saksow wotměje so po wšěm zdaću cyle bjez wobdźělenja někajkeho serbskeho kulturneho abo dalšeho ćělesa. To wunjesechu rešerše a naprašowanja Serbskich Nowin. Muski chór Delany, kotryž je Serbow 25 króć na cyłosakskim swjedźenju zastupował a serbske kaž tež słowjanske štučki na najwšelakorišich jewišćach zanošował, mjeztym druhi raz pódla njeje. Tež Budyska Serbska kulturna informacija, kotraž wšak bě po dlěšej přestawce minjene lěta zaso na wjacorych Dnjach Saksow zastupjena była, njebudźe lětsa w Riesy za Serbow wabić, wobkrući na naprašowanje sobudźěłaćerka Jaqueline Bjeńšec.
Budyšin/Choćebuz (SN/JaW). Čłonojo Zwjazkoweho předsydstwa Domowiny wěnuja so jutře w Choćebuzu hnydom wjacorym wažnym temam. Tak předstaji předsydka Rady za serbske naležnosće Sakskeje Marja Michałkowa bilancu dźěławosće minjeneje wólbneje doby. Zdobom maja čłonojo gremija wobzamknyć wólbny porjad, zo móhli nominować štyrjoch kandidatow za wólby noweje serbskeje rady Sakskeje. „Kandidaća so jutře žani njepředstaja, za to bě doba přeprošenja překrótka“, wujasni předsyda Domowiny Dawid Statnik. „Jich předstajimy na wurjadnym zarjadowanju.“
Wěnować chcedźa so jutře w Choćebuzu mjez druhim tež tomu, kak zwoprawdźeja wobzamknjenja k wuslědkam ewaluacije wučby serbšćiny na braniborskich šulach. W srjedźišću ma stać prašenje, kak w naležnosći nětko po wólbach dale postupować. Zdobom maja w tym zwisku tež swójske stejišćo zdźěłać.