Młodych Serbow zaměrnje zdobyć

Freitag, 05. Oktober 2018 geschrieben von:

Radwor (SN/MkWj). Něhdźe dwaceći zajim­cow sćěhowaše wčera wječor pře­prošenje předsydy Domowiny Dawida Statnika na „serbski wječor“, kotryž wotmě so w Radworskim hosćencu „Zelena hałžka“ při sportnišću. Z nowej formu zjawnostneho dźěła chce třěšny zwjazk ludźom rozłožić, kak gremije kaž załožbowa rada, Domowina a Radźe za serbske naležnosće Sakskeje a Braniborskeje dźěłaja. Při tym bě wčera spěšnje spó­znajomne, zo je pobrachowacy dorost zamołwitym jedyn z hłownych problemow. Gmejnski radźićel Pětr Kliman namjetowaše, z wodźacymi ludźimi zaměrnje dźěłać a wjace młodych Serbow zdobyć. W tym zwisku rěčachu tež wo serbskim narodnym kubłanju w šuli. Bywši předsyda Domowiny Jan Nuk wospje­towaše swoje žadanje, předmjet „ludowědu“ zawjesć, zo by so narodne sebjewědomje młodych ludźi skrućiło.

Chcyjo nochcyjo zaběrachu so tež z bór­zomnymi wólbami Serbskeho sejma. Dawid Statnik argumentowaše, zo njeby tajki sejm ničo na tuchwilnym połoženju Serbow změnić móhł, chibazo k dalšemu pačenju našeho ludu přinošuje.

Centralna šula žana tema

Donnerstag, 04. Oktober 2018 geschrieben von:

Pančicy-Kukow (SN/JaW). Kubłanje a šulstwo stej najwažnišej temje w Serbach. To wujewi prěni serbski wječor Domo­winy, Rady za serbske naležnosće Sak­skeje a Załožby za serbski lud wutoru w Pančicach-Kukowje. Něhdźe 30 zajimcow, mjez nimi tójšto młodostnych, zhoni tak rjec z prěnjeje ruki wo skutkowanju mjenowanych gremijow. Dawid Statnik předstaji jako předsyda Domowiny dźěławosć třěšneho zwjazka, předsydka sakskeje serbskeje rady Marja Michał­ko­wa poda nimo nadawkow rady tež historiski wid na strukturu gremijow, direktor Załožby za serbski lud Jan Budar rozłoži natwar, skutkowanje a ćeže zarjada załožby a jeje rady.

Wjacori přitomni přejachu sej konkretnu pomoc při zwoprawdźenju najwšelakorišich projektow, předewšěm ho­ber­skeje běrokratije dla. Matej Dźisławk skedźbni na to, produkciju serbskich zynkonošakow podpěrać. „Tak rěč na lóštne a zabawne wašnje dale dawamy“, wón měnješe. Jan Budar drje jemu přihłosowaše, skedźbni pak na to, zo spěchowanje hudźby zdźěla tež kreatiwnosć hudźbnikow potłóča.

Druhi pospyt premjery w Radworju poradźeny

Donnerstag, 04. Oktober 2018 geschrieben von:

Wčera měješe w Radworju Běh wo pokal zbóžneho kapłana Alojsa Andrickeho swoju wuspěšnu premjeru. Cyłkownje je so na nim něhdźe 150 sportowčow a sportowcow wobdźěliło.

Radwor (jwo/SN). Wosadny farar Beno Jakubaš witaše wčera dopołdnja při Ra­dworskim sportnišću wobdźělnikow a ho­sći prěnjeho běha wo pokal zbóžneho Alojsa Andrickeho z krótkim nyšporom. Něhdźe 150 atletow z cyłeje Hor­njeje Łužicy je so na to w 13 starobnych skupinach, wot šulskich započatkarjow hač k nazhonitym běharjam, wubědźowało. Dźěći podachu so na 500metrowsku čaru, mjeztym zo dyrbjachu dorosćeni dwaj do šěsć kilometrow zmištrować. Tak běžachu wot Radworskeho sportnišća přez Mały lěs a Młynske chěže samo hač do Bronja. Kóždy z wobdźělnikow smědźeše sam rozsudźić, kak najlěpje wolenu čaru zmištruje: hač z hudźbu na wušomaj, z psom poboku abo z pomocu walkingowych kijow.

Dobre poradźenje

Donnerstag, 04. Oktober 2018 geschrieben von:
Domowina, sakska serbska rada a Załožba za serbski lud su wutoru w Pančicach-Kukowje nowy rjad zarjadowanjow zahajili. Serbski wječork so wón mjenuje, a z rozmołwami na wšelakich městnach we Łužicy chcedźa gremije wuslědźić, hdźe wšitko běži, hdźe klaca a z čim njejsu ludźo spokojom. Zdobom chce Domowina zwisk k bazy polěpšić a skrućić. Wutorny zazběh je so wočiwidnje poradźił. Přede­wšěm młodostni, mjez nimi tež tajcy, kotřiž Domowinje njepřisłušeja, chwalachu sej składnosć, swoje měnjenje zwuraznić směć a zo su słyšani. Tež ja mam postupowanje za dobre, trěbne a wažne. Z prawom pak so wjacori prašeja, čehodla njeje třěšny zwjazk hižo dawno z tym započał? Wšako sej mnozy hižo dlěje lěpši zwisk k bazy žadaja. Kritizować drje je lochko, zarjadowanje zaměrnje a prawidłownje zwoprawdźeć, pak je spore dźěło. Přeju tuž přichodnym tajkim Serbskim wječorkam dobre poradźenje. Janek Wowčer

Hotuja so na klětuši mały jubilej

Dienstag, 02. Oktober 2018 geschrieben von:
Z dwurěčnymi kemšemi, kotrež wobrubichu mjez druhim Rowniske glosy, zaha­jichu njedźelu na Rownjanskim Njepilic statoku 19. dworowy swjedźeń. Runočasnje wotmě so dwurěčna dźěćaca Boža słužba. Při wulkotnym nazymskim wjedrje poskićachu wopytowarjam připołdnju a popołdnju tójšto kulinariskich wosebitosćow. Najpožadaniši wšak bě burski chlěb, kotryž je pjekarski mišter Helmut Čamar w swojej, z drjewom tepjenej pjecy pjekł. Wo hudźbne wobrubjenje staraše so mjez druhim Rownjanska šalmajowa kapała. Wona budźe tež klětu na 20. dworowym swjedźenju pódla, kaž předwčerawšim rěkaše. Foto: Jost Schmidtchen

Z naprašnikom mnohich docpěć

Donnerstag, 27. September 2018 geschrieben von:

Budyšin (kl/SN). Wo móžnych kandidatach do rady Załožby za serbski lud we wólbnej periodźe 2019–2023 je předsydstwo Domowinskeje župy „Jan Arnošt Smoler“ wčera w Serbskim domje w Budyšinje wuradźowało. Hač do 1. no­wembra maja so namjety zapodać, tak chcedźa na oktoberskim posedźenje doskónčnje wo župnym namjeće rozsudźić.

Čłonojo předsydstwa dorozumichu so nastupajo naprašnik skupinam a towarstwam Domowiny. Kak hodźał so na­­naj­lěpje rozdźělić, zo bychu prawje wjele sobu­stawow docpěli? Wuzběhnychu móž­nosć naprašnik w interneće wupjelnić.

Składnostnje 750. měšćanskeho ju­bileja Wojerec podachu so na župnym wulěće po slědach serbskich stawiznow města a zeznachu aktualnu situaciju Serbow we a wokoło Wojerec. W tym zwisku rozjimachu, dalokož je so zaměr jězby, poskitk měć za wšitkich zajimowanych Serbow, tež spjelnił.

Přichodne zarjadowanje župy budźe swójbne popołdnjo 27. oktobra w Pawołskej šuli w Rakecach. Zhromadnje ze šulu so zarjadowanje, kiž započina so w 15 hodź., přihotuje.

Předsyda Domowiny Dawid Statnik a referent za kulturne naležnosće a wukraj Clemens Škoda staj so wčera w Senaće parlamenta Čěskeje republiki w Praze senatorej Jaromírej Jermářej (naprawo) za jeho spomóžne dźěło za Serbow a serbsko-čěsku wuměnu dźakowałoj. Jermář w lětušim kole senatskich wólbow znowa njekandiduje. Přitomny bě tež předsyda Towarstwa přećelow Łužicy (SPL) Lukaš Novosad. Na to staj so zastupjerjej Domowiny w Serbskim seminarje zetkałoj z něhdyšim čěskim generalnym konsulom w Drježdźanach Jiříjom Kudělu, kotryž nětko w Praze dźěła. Woběmaj staj serbskeho dudaka, dźakne ­wopismo a knihu jako mały dar přepodałoj. Foto: Clemens Škoda

Online-naprašnik so hišće dliji

Mittwoch, 26. September 2018 geschrieben von:

Budyšin (SN). Wid čłonow serbskich towarstwow a zwjazkow pod třěchu třěš­neho zwjazka a zwonka njeho na swójske skutkowanje chce Domowina z naprašowanja zhonić, kotrež tuchwilu přewjedźe. Nimo ćišćaneho naprašnika a tajkeho ja­ko­ PDF-dataja, kotraž steji na internetnej stronje Domowiny www.domowina.de za indiwiduelne wućišćenje k dispoziciji, prócuje so zamołwity wuběrk za zjawnostne a lobbyjowe dźěło Domowiny tež wo online-naprašnik. Tutón projekt přewodźaca agentura z Lipska programěruje. Někotrych wudospołnjenjow dla njeje online-naprašnik w interneće hišće přistupny.

Myto Domowiny třom wosobam

Mittwoch, 26. September 2018 geschrieben von:

Budyšin (SN/at). Hnydom dwaj lawreataj lětušeho Myta Domowiny resp. Myta Domowiny za dorost je Budyska župa „Jan Arnošt Smoler“ namjetowała. Wjelelětnu předsydku ­Domowinskeje skupiny Baćoń/Haslow Hilžu Mehrowu počesća z najwyšim wuznamjenjenjom třěšneho zwjazka runje tak kaž Bjarnata Rjentša z Choćebuza a rejwansku pedagogowku Alenu Kubankovu z Budyšina.

Nad Mytom Domowiny za dorost smě­tej so wjeselić skupinje Berlinska dró­ha, namjet Budyskeje župy, a Deyzidox, wot Kamjenskeje župy podaty.

Čestne znamješko Domowiny 2018 spožča Resi Lotrinje z Hochoze, Sybili Bertra­mowej z Kózleho, Doris Heincowej ze Žylowa, Danielej Wjenkej ze Smjer­dźaceje, Pětrej Korjeńkej z Pančic-Kukowa, Milanej Hrabalej z Warnoćic, Cyrilej Pjechej z Berlina, Lucianej Kaulfürstej z Budyšina, Janej Wawrikej z Chrósćic a Lukašej Novosadej z Prahi.

Mjena počesćenych je mytowanski wuběrk Domowiny dźensa wozjewił. Wuznamjenjenske zarjadowanje budźe pjatk, dnja 5. oktobra, w Budyskim Serbskim domje.

Čestne čłonstwo Janej Bukej

Montag, 24. September 2018 geschrieben von:

Zwjazk serbskich wuměłcow je na hłow­nej zhromadźiznje swoje wustaw­ki změnił a wo přichodźe towar­stwa wuradźował.

Anzeige

  • 21. jolka-swjedźeń w Nuknicy je nimo. Štož zwostanje su dopomnjenki na rjany žortny a zabawny wječor w Nukničanskej Brězanec bróžni. Někotre impresije serbskeho wječora w Nuknicy, kotrež je naša fotografowka-wolontarka Hanka Šěnec zhotowiła, wam tule
  • Serbske Nowiny-LND-Tuchmacherstr. 27 02625 Bautzen: Jolka 12.01.2019
  • Serbske Nowiny-LND-Tuchmacherstr. 27 02625 Bautzen: Jolka 12.01.2019