Na lětuši cyłoněmski předčitanski dźeń je sej dźensa dopołdnja do Bukečanskeje pěstowarnje „Słónčny róžk“ Weronika Butendei­chowa z Rěčneho centruma WITAJ (naprawo) dojěła. Po wašnju tradicionalneho japanskeho dźiwadła kamishibai předsta­ji wona dźěćom najprjedy čitajo a na to z nimi hrajo powědku „Žabjacy kral“. Foto: SN/Hanka Šěnec

pj., 15. nowembera 2019

Berlin/Zhorjelc (SN). Etatowy wuběrk zwjazkoweho sejma je we wobłuku swojeho wčerawšeho wurunanskeho posedźenja wo doskónčnym budgetowym planje za lěto 2020 namjetej knježerskeje koalicije CDU, CSU a SPD přihłosował, serbske projekty přidatnje pjenježnje podpěrać.Zwjazkowa přiražka za Załožbu za serbski lud zwyši so klětu wo cyłkownje 165 000 eurow na potom dohromady něhdźe 9,5 milionow eurow. Z přidatnymi srědkami ma so „serbskimaj wubrankomaj žonow resp. muži zmóžnić so na europskich koparskich mišterstwach awtochtonych, narodnych mjeńšin ‚Europeada 2020‘ w Korutanskej wobdźělić.“ To pisa zapósłanc zwjazkoweho sejma Thomas Jurk (SPD) ze Zhorjelca w zdźělence našemu wječornikej. Za turněr je 90 000 eurow předwidźanych. Nimo toho „je za koncepciju a wuwiwanje serbskeho portala jako marketingowy instrument přidatnych 75 000 eurow k dispo­ziciji“, zapósłanc dale wuwjedźe.Thomas Jurk komentuje: „Wjeselu so jara, zo móžach jako čłon wuběrka k tomu přinošować, kulturnu wjelorakosć w Němskej ...

pj., 15. nowembera 2019

Drježdźany (SN). Sakska spěchuje ně­hdźe sto kulturnych předewzaćow na polu małych projektow. Sakska ministerka za wědomosć a wuměłstwo dr. Eva-Maria Stange (SPD) rjekny: „Małe kulturne projekty na wsach su dobre za mjezsobnosć a mnohotnosć zdala wulkich městow.“ Dr. Stange skedźbnja tak na wuspěch spě­chowanskeho fondsa za małe pro­jekty z wobłuka wuměłstwo a kultura ze stron­ ministerstwa a kulturneje za­łožby Swobodneho stata Sakskeje, kotryž su lětsa prěni króć zarjadowali.W třoch fazach bu wot junija 2019 něhdźe sto předewzaćow we wobjimje 300 000 eurow spěchowanych. Napra­šo­wanje je wo wjele wjetše. Do kultur­neje załožby bě 279 próstwow za wjace hač 970 000 eurow dóšło. Klětu chcedźa program dale wjesć. Financne srědki su w eta­će zaplanowane. „Jara nas spokoja wi­dźeć­, kak wulki je wužitk poměrnje ma­łe­ho spěchowanja“, ministerka podšmórny. „Mnohe wažne kulturne předewzaća su přemałe, zo by móhli je kulturna załož­ba abo kulturne rumy spěchować. Tak pak hodźi na zakładźe jed ...

pj., 15. nowembera 2019

Kónctydźenski wolejbulPo tym zo su Worklečanscy wolejbulisća tydźenja přećiwo Módro-běłym Wojerecy poziciju načolnika we wobwodnej lize wuchodneje Sakskeje přewzali, chcedźa woni jutře euforiju sobu do města wzać. Pola rezerwy MSV Budyšin 04 bychu wězo rady połnje dypkowali. Domjacy hrajny dźeń změje sobotu w Pančicach rezerwa HZ Pančicy-Worklecy.16.11. 14:00 MSV Budyšin II –  Viktoria Worklecy16.11. 16:00 Schönbachske VV –  Viktoria Worklecy (ž)16.11. 14:00 HZ Pančicy-Worklecy II –  Módro-běłe Wojerec II (ž)16.11. 16:00 HZ Pančicy-Worklecy II –  MSV Budyšin 04 III (ž)23.11. 10:00 Módro-běłe Wojerecy II –  Viktoria Worklecy (ž)23.11. 14:00 JTVG Koblicy –  HZ Pančicy-Worklecy (ž)Běhaja wokoło BrusnikaNimale 200 wobdźělnikow je so za 27. běh wokoło Brusnika (Braunsteich) wuchodnje Běłeje Wody přizjewiło. Tón přewjedu jutře wot 10 hodź. při dźěćacym přebywanišću KiEZ při Brusniku Běła Woda. Do startowych lisćin su mj. dr. tež Corinna Měrćinkowa z Chelna (5 km nordic walking), Roman Měrćin ...

pj., 15. nowembera 2019

Fota: Diana Fryčec-GrimmigowaHač rožka, pšeńca abo ječmjeń, na polach je žito lětsa derje zrawiło. Mjeztym su ratarjo hižo nazymski wusyw dokón­čili. Jenož derje, zo žnějachu syčomłóćawy zrałe zorno. „Před­stajće sej raz, kak su za čas wašich pra­dźědow a pra­wowkow, žito žnjeli!“, praji naša rjadowniska wučerka, a pokaza nam stary, trochu zapróšeny ratarski grat. „Chcemy zhromadnje wo tym powědać a sej při tym dru­žiny žita zbližić.“ Wuknjechmy, zo wobsteji jednotliwa rostlina z kłóski, ze stwjelca, ze sučka, z łopjenow a korjenjow. Z muki rožki pjeku nam pjekarjo słódny chlěb. Z muki pšeńcy móžeš nudle dźěłać, a z ječmjenja wari piwarc piwo. Tak daloko, wšo derje. Kak pak sej nětko rozdźěle žita spomjatkować? „J  e  č  m  j  e  ń“, ma dołhe kochty, kaž włosy. Kochty „rožki“ skoča horje kaž našej ruce, hdyž do powětra skočimy, tak su krótše, stejate. A „pšeńca“, nima žane kochty. Tak móžemy klětu družiny žita rozeznawać, hdyž zaso na polach rostu. Kaž wulke husańcy běchu syčomłóćawy ...

pj., 15. nowembera 2019

Něhdźe sto zastupnikow městow a wsow łužiskeje brunicoweje kónčiny je wčera před kanclerskim zarjadom w Berlinje demonstrowało. Z mjenowymi taflemi swojich komunow w rukach žadachu sej woni wot zwjazkoweho knježerstwa, zo swoje přilubjenja nastupajo strukturnu změnu skutkownje přesadźi. To rěka wutworić nowe dźěłowe městna, prjedy hač so zmilinjenje brunicy skónči. Zwjazkowy minister za hospodarstwo Peter Altmaier (CDU) je delegaciju demonstrantow přijał. Foto: Joachim Rjela

pj., 15. nowembera 2019

Gospelowy oratorij w cyrkwiBudyšin. Jutře, sobotu, w 19 hodź. a njedźelu, 17. nowembra, w 16 hodź. su za­jimcy do Budyskeje­ Marje-Marćineje cyrkwje na gospelowy oratorij „Prince of peace“ přeprošeni. Hudźbu postajeja chórowe a orchestrowe pasaže w stilu jazza, gospela, bluesa hač ke grego­rianskemu choralej. Koncert wuhotuja ewangelske kantorstwo tachantskeje cyrkwje, orchester SLA a bigband pod nawo­dom cyrkwinskeho hudźbneho di­rek­tora Michaela Vettera.Dalše Smochčanske jewišćoSmochćicy. We wobłuku Smochčanskeho jewišća wuhotuje kwartet Amaryllis jutře, 16. nowembra, w 19.30 hodź. koncert w Smochčanskim Domje biskopa Bena. Na programje steja smyčkowe kwartety Franza Schuberta, Bele Bartóka a Ludwiga van Beethovena.Wosebite wodźenjeNarć. Wojerowski hród a měšćan­ski muzej přeprošatej jutře wot 13 hodź. na wosebite wodźenje po wo­pomnišću za wójnskich jatych w Narću. Na awtentiskim městnje móža sej wo­pytowarjo stawizny lěhwa wuhnatych wuwědomić.Předstaja komediju dalši króć ...

pj., 15. nowembera 2019

Tež lětsa su so mnozy lubowarjo koni jěchajo abo ze zapřahom na lětušej tradicionalnej Hubertusowej hońtwje wokoło Kulowa wobdźělili. Tróšku zymne a pancate wjedro drje runje do přirody njewabješe, to pak konjacych sportowcow njemyleše. Wšako běchu wotpowědnje zdrasćeni. Prjedy hač podachu so wšitcy zhromadnje na kołojězbu wokoło Koćiny, delnich Sulšec, Salowa a Kulowa, je z nimi Kulowski farar Gabriš Nawka na łuce pola Koćiny krótki nyšpor swjećił. Foto: Gernot Menzel

pj., 15. nowembera 2019

Budyšin (SN/BŠe). Nimale we wšitkich rjemjeslniskich powołanjach maja předewzaćeljo ćeže wučomnikow nańć. Tak je to tež pola pjekarjow. Srjedu wura­dźo­waše zjednoćenstwo pjekarjow Budyskeho wokrjesa wo wuskutkach na powo­łanskošulski centrum za zežiwjenje a domjacnosć w sprjewinym měsće. Nimaja tam hižo dosć wučomnikow w rjadownjach. A přiběra strach, zo teoretiske wukubłanje wučomnikow na druhe stejnišćo přeměstnja. „Wot sakskeho kultusoweho ministerstwa wočakujemy hladajo na rozdźělenje stejnišćow jasne wuprajenje“, rjekny předsyda zjednoćenstwa Budyskich pjekarjow Lutz Neumann. W powołanskošulskim centrumje wšak maja wuběrne móžnosće, kwalifikowany dorost wukubłać. Nimo toho poskićeja 44 internatnych městnow. „We wólbnym boju bě často rěč wo tym, wjesne kón­činy sylnić. Město Budyšin k tomu słuša. Nadźijamy so tuž pozitiwnych wuprajenjow“, Neumann wuzběhny. Wobchadna infrastruktura z dwórnišćom a busowym dwórnišćom njedaloko centruma skićitej dobre zwiski. „Ćahi njejězdźa jenož do ...

pj., 15. nowembera 2019

Pólska opozicija pyta noweho kandidata za prezidentske wólbyWaršawa. Tale powěsć pólsku opoziciju překwapja: Bywši ministerski prezident a tuchwilny prezident Europskeje rady Donald Tusk njebudźe klětu za prezidentske wólby kandidować. To je wón po dołhim mjelčenju tydźenja w Brüsselu připowědźił. Tusk bě wot lěta 2007 do 2014 ministerski prezident kraja, mjeztym pak nawjeduje pjeć lět zastupnistwo wšitkich 28 čłonskich statow Europskeje unije.

pj., 15. nowembera 2019

„Šorcuch, jaka, hutawka“ rěkaše dźěłarnička k hotowanju narodneje drasty předwčerawšim w Brětni, na kotruž bě Serbski drastowy forum přeprosył. Mějićelka Wojerowskeho Wjacsławkec drastoweho domu a sobuzałožerka Kirsten Bejmina je tam ze swojej dźowku Lisu pokazała, kak so dźěłowu drastu ewangelskich Serbow wokoło Wojerec woblěkać. Přitomni diskutowachu tam tež wo naležnosćach serbskeje narodneje drasty a wuměnjachu sej nazhonjenja. Foto: Gernot Menzel

nawěšk

SERBSKE NOWINY podpěruja:

Novi Sad – kulturna stolica Europy

nowostki LND