Nalětni kolokwij k zajimawym wosobinam
Stróža (SN/JK). Wulka ličba znatych a mjenje znatych wosobinow je stawizny Hornjeje Łužicy sobu pisała. Na nich spominać a njeznate strony jich žiwjenja wobswětlić bě zaměr wčerawšeho kolokwija w Stróžanskim Domje tysac hatow. Spěchowanske towarstwo Přiroda hornjołužiskeje hole a hatow je namakało ludźi, kotřiž so ze skutkowanjom markantnych wosobinow Łužicy zaběraja. W zajimawych přednoškach zhonichu hosćo wo znatym a njeznatym ze žiwjenja wosobow, kotrež běchu slědy we Łužicy zawostajili.
Po witanju čłonki spěchowanskeho towarstwa Silke Hentschel, zahaji Stróžan Sieghard Kozel kolokwij z přednoškom wo Korli Awgusće Kocoru. Na čiłe wašnje předstaji wón puć Kocora wot jednoreho wučerja k załožerjej klasiskeje serbskeje hudźby. Při tym wobswětli wosebje jeho njelochki čas w Stróži a wuwiwace so přećelstwo k Handrijej Zejlerjej. Někotři z hosći zasłyšachu prěni raz wurězki z oratorija „Nalěćo“, předstajene jako přikład Kocoroweje tworićelskosće.
