Minister Ulbig do druheho koła hižo njenastupi

Drježdźany (dpa/SN/K). Słaba we wulkoměstach, sylna na wsach. CDU je při komunalnych wólbach wčera znowa wšitke krajnoradne zarjady zdobyła, z wólbow wyšich měšćanostow wšak chětro poskubana wušła. Z Drježdźanami zhubi wona poslednje němske wulkoměsto z wjace hač 500 000 wobydlerjemi.W sakskej stolicy bě so minister za nutřkowne naležnosće Markus Ulbig (CDU) wo to prócował, nastupić naslědnistwo Helmy Orosz, kotraž bě strowotnych přičin dla zastojnstwo złožiła. Ulbig dósta wšak jeničce 15,4 proc., z kotrymiž wón tež jeno 3. městno wobsadźi. Z kruhow strony so tuž dźensa wozjewi, zo Ulbig do wurisanskeho koła hižo njenastupi. Nutřkowny minister pak wón wostanje.