Dobry wothłós na kulturnu nóc

póndźela, 15. junija 2015
artikl hódnoćić
(0 )
 W Budyskej Dołhej nocy kultury je SLA „Blunjanski kwas“ pokazał.  Foto: Carmen Schumann W Budyskej Dołhej nocy kultury je SLA „Blunjanski kwas“ pokazał. Foto: Carmen Schumann

Budyšin (CS/SN). Dołha nóc kultury sobotu je tež lětsa zaso sta zajimcow přiwabiła. 19 Budyskich kulturnych zarjadnišćow, mjez druhim Serbski ludowy ansambl, Serbski muzej a Němsko-Serbske ludowe dźiwadło, so wobdźěli, z čimž njeběchu wšitke móžnosće hišće wučerpane. Wšako njejstej na přikład Zuseum a Marje-Marćina cyrkej tónkróć personalnych přičin dla pódla być móhłoj. Za to­ pak běštej powołanska akademija a antikwariat Keller prěni raz swoje durje wotewrěłoj.

Poskitk bě jara wšelakory a sahaše wot čitanjow přez přednoški hač k hudźbnym přinoškam. Dokelž we hłownym domje SLA twarja, přećahnychu wuměłcy do Hamornika (Hammermühle). Tam na dworje natwarjene jewišćo pak njewjedra a dešćika dla tež wužiwać njemóžachu, tuž předstajištej orchester a chór program nutřka w młynje. „Blunjanski kwas“ je mjez hosćimi, mjez kotrymiž běchu tež kandidaća za Budyskeho wyšeho měšćanostu, jara dobry wothłós žnjał. Ansamblowcy běchu z ćežkich městnostnych wuměnjenjow to najlěpše sčinili.

wozjewjene w: Kultura
Prošu přizjewće so, chceće-li komentar podać

Serbska debata

nowostki LND