Zagor (AP/SN). Rjemjesło wokoło Mužakowa bě tema lětušeho zetkanja dźěłoweho kruha Łužiske muzeje a muzealne zarjadnišća Maćičneje sekcije ludowěda/muzejownistwo. W Zagorskim muzeju rjemjesła a přemysła zeńdźe so wčera pjatnaće zajimcow z Hornjeje a Delnjeje Łužicy. Předsyda spěchowanskeho towarstwa muzeja Gotthard Kreisel wodźeše po stajnej wustajeńcy a rozłoži najwšelakoriše nastroje a techniki wobdźěłanja drjewa, zhotowjenja košow, šewcowstwa a dalšich. Drjewo, hlinina (Löss), železowa ruda, pěsk a brunica běchu hospodarski zakład za wosebite rjemjeslniske a industrijne wuwiće Mužakowskeje hole, kotrejež pěskojta rola so za ratarstwo lědma hodźeše. W přednošku „400 lět hornčerstwo kołowokoło Mužakowa“ rozłoži fachowča Helga Heinzowa wosebitosće swětoznateje Mužakowskeje bruneje keramiki a přechod k industrijnej produkciji kamjeninowych tworow. Z 20 něhdyšich Mužakowskich hornčernjow njezby ani jenička, wothladajo wot dweju w Zagorju. Ćim wažniša je bohata zběrka muzeja, hdźež wustajeja tež serbske drasty a objekty ze wšědneho dnja holanow.