19. koparski turněr starych knjezow wo pokal Serbskeho Sokoła
Hižo loni w Chrósćicach bychu klóšterscy koparjo pokal Serbskeho Sokoła dobyć móhli. We wšo rozsudźacej hrě pak njemóžachu ST 1922 Radwor přewinyć. Tež lětsa tomu tak bě, a Ralbičenjo běchu ći zbožowniši. Sokoł Ralbicy a ST Marijina hwězda měještej z dźewjeć dypkami samsnu ličbu ličakow, za to pak rozdźělny wrotowy poměr.
Přeprosyło bě předsydstwo Serbskeho Sokoła šěsć cyłkow, přijěło bě pjeć. Kóždy hraješe přećiwo kóždemu, a to stajnje 12 mjeńšin. Pod nawodom sudnika Matijasa Krala ze Smjerdźaceje běchu hry fairne. Negatiwne pak bě, štož turněrowemu nawodźe Janej Hrjehorjej po wurisanju napadny, zo je so tójšto koparjow zraniło.