Z přepodaćom wuswědčenjow kónči so dźensa šulske lěto 2014/2015, a šulerjo runje tak kaž wučerjo a starši wjesela so na prózdniny a dowol. Mnozy podadźa so přichodne dny z awtom k morju abo do horow, nastupja jězbu z wulkej pasažěrskej łódźu, doleća sej snano samo do dalokeho wukraja a tam najrjeńši čas lěta přežiwja. Chibazo wostanu doma, hdźež móža so tež we łužiskej jězorinje abo prosće na zahrodźe wočerstwjeć.
Wšojedne, dokal sej wy dojědźeće abo dolećiće, njezabudźće na swój fotoaparat, wšako měli so rjane a zajimawe wokomiki zapopadnyć a zwěčnić. Na tele wobrazy su tež lětsa zaso Serbske Nowiny wćipne, wšako pytamy znowa najrjeńše dowolowe foto swojich čitarjow. Hač su to chowace so słónco za morjom, spektakularny napohlad w horach abo dźěćaca zabawa při domjacym swimmingpoolu – připósćelće nam swój najrjeńši wobraz e-mailnje na adresu abo z póštu redakciji Serbskich Nowin, Sukelnska 27, 02625 Budyšin. Njezabudźće nam napisać, hdźe je wobraz nastał kaž tež štó a što je na nim widźeć. Přichodne tydźenje chcemy po móžnosći prawje wjele z tychle wobrazow wozjewić.
