Grjekska namjety předpołožiła

pjatk, 10. julija 2015
artikl hódnoćić
(0 )

Brüssel/Athen (dpa/SN/K). Pozdźe, ale nic přepozdźe bě pola euroskupiny w Brüsselu w nocy z Athena reformowa lisćina e-mailnje dóšła. Eksperća komi­sije EU, Europskeje centralneje banki a Mjezynarodneho měnoweho fondsa (IWF) nětko pruwuja, hač namjety wuměnjenja za třeći pomocny paket spjelnjeja.

Spomnjena lisćina wobsahuje po powěsćerni dpa zaměry grjekskeho knježerstwa do toho směra, zwyšić nadhódnotowy dawk za hotele. Niši nadhódnotowy dawk za kupy ma wotpadnyć. Předwidźane su tohorunja zwyšenja dawkow a rentowa reforma. Rentowa staroba ma so na 67 lět zwyšić.

Za swoju zwólniwosć chcyła Grjekska wot Europskeho wuchowanskeho krywa pomocny paket we wobjimje 53,5 miliardow eurow, zo móhła hač do lěta 2018 swój dołh zarunać. Nimo toho žada sej wona spušćenje dołha. W tym nastupanju nachadźa Athen mjeztym podpěraćelow. Tak je so mjez druhimi šefina IWF Christine Lagarde za to wuprajiła.

wozjewjene w: Kraj a swět
Prošu přizjewće so, chceće-li komentar podać

Serbska debata

nowostki LND