Budyšin (SN). „Mój serbski słownik“ je titul noweje knihi spisowaćela Alfonsa Frencla z Róžanta, kotraž je nětko w Ludowym nakładnistwje Domowina wušła.
W nowostce pućuje wučer na wuměnku po serbskim alfabeće, zo by pochad woteznatych a njewšědnych wurazow wotkrył a so tak do stawiznow rěče zanurił. Mjez druhim praša so za tym, čehodla rěka bydlenska štwórć we Worklecach Nuhlik, zwotkel bjerje so wuraz fawca a što je poprawom z třemjenjom měnjene. Slědźo a kedźbyhódne podeńdźenja wopisujo njerozhladuje so Róžeńčan w swojej runje wušłej knize jenož po domjacych zahonach a blišej łužiskej wokolinje, ale pućuje zhromadnje z čitarjom po zwučenym wašnju po wšěm swěće, při čimž nachadźa zajimawe paralele k serbšćinje. Tak čitar na přikład zhoni, kotry zwisk wobsteji mjez ruskim napojom z mjenom kwas a serbskim swjedźenjom ze samsnym pomjenowanjom, hdźe bu prěnja cyrkej w Hornjej Łužicy postajena, što maja póst a póstnicy zhromadneho a što je zakład wuraza saperlot.