14. Krabatowy swjedźeń wotmě so kónc tydźenja w chorwatskim Žumberaku, domiznje historiskeho Krabata. Wobdźěliło je so něhdźe 60 ludźi z Łužicy, nimo čłonow tudyšeho Krabatoweho towarstwa tež sobuskutkowacy Ćišćanskeje rejwanskeje skupiny.
Sveta Gora (SN/CoR). Na najwyšim wjeršku Žumberakskich horin na mjezy k Słowjenskej Sveta Gora su wčera připołdnju Chorwaća, Serbja a Němcy zhromadnje z Božej mšu Krabatowy swjedźeń zahajili. Šěsć fararjow je tam w kapale swjateho Ilije po grjeksko-katolskim ritusu kemše swjećiło. Kapała bě přepjelnjena, hačrunjež mějachu kemšerjo njewočakowane ćeže, tam dojěć. Hinak hač na chorwatskim wabjenskim plakaće za „Krabatfest“ njebě njebjo nad kapału módre, ale sylna kurjawa a njewjedro puć poćežowaštej. Ćim wjetši zaćišć pak je podawk w přitomnych zawostajił. „Wohnjowa wobora dyrbješe nam najprjedy puć rubać, dokelž bě wulki wichor wjacore štomy spowalał. Zdźěla běchu puće tež přepławjene. Za nas wšitkich bě to dyrdomdej, tež dožiwjenje po tym bě wulkotne a hnujace“, zdźěli Wolfgang Kraus alias Krabat Serbskim Nowinam.
