Korigowana aktualna prognoza ličby ćěkancow pokazuje nadawki krajow
Berlin (dpa/SN). Zwjazkowe knježerstwo Němskeje liči w běžnym lěće z hač do 800 000 próstwami wo azyl w Němskej. To zdźěli zwjazkowy nutřkowny minister Thomas de Maizière (CDU) wčera w Berlinje. Z tym bu prognoza daloko dowysoka korigowana, wšako běchu dotal z jeno 450 000 ćěkancami ličili. Telko ludźi njebě w stawiznach Němskeje hišće ženje wo azyl prosyło.
Z tym rostu wužadanja a nadawki za wšitke zamołwite mocy a zarjady w Berlinje runje tak kaž w zawjazkowych krajach. Na zwjazkowe kraje a jich komuny čakaja wulke napinanja, zo bychu požadarjow azyla zaměstnili a zastarali. Sakska změje so na 40 000 ćěkancow přihotować. Po tak mjenowanym Königsteinskim kluču měła Sakska 5,1 procent potrjechenych přiwzać. Dźiwajo na korigowane ličby by to było 40 700 ćěkancow, ličili su z něšto nad 22 000.