8. oktobra 1790 zapopadny Zhorjelski krajinowy moler Johann Gottfried Schultz (1734-1819) tehdy wšědnu situaciju před Serbskimi wrotami w Budyšinje. Widźeć su wysoke wobtwjerdźenje a prěnje ze znajmjeńša dwojich wrotow, w pozadku znata Bohata a naprawo Serbska wěža, pod kotrejž běchu poslednje wrota. Před nimi móst přez snadź hižo zasypanu hrjebju, kotraž wupřestrěwaše so něhdy před nutřkownej měšćanskej murju. Po lěwym boku mamy domowu frontu Serbskich hrjebjow.
Prěni dom móhł runje zarjadowana šula za 120 chudych dźěći města być. Załožił je ju lěta 1783 překupc Johann Chrystof Prenzel. Wón bě so do Bjenadźic wulkowikowanskeje swójby serbskeho pochada woženił, zbohatnył a zdźěla tež z tutym zamóženjom wonu šulu financował. Dźensa namakamy tam, w mjeztym přetwarjenym domje, Heinzec rěznistwo (napřećo Budyskemu financnemu zarjadej). W dalšim z hišće stejacych domow mamy Marxec pjekarstwo. Na prawym boku prědku, traš na městnje dźensnišeho parkowanišća před financnym zarjadom, steji tykowana chěža-hěta, před kotrejž leži hromada wšelakich kamjenjow. Što so za wonej hětu chowa?
