Jutře na skupinsku jězbu
Pančicy-Kukow. Čłonojo Domowinskeje skupiny Pančicy-Kukow njech njezabudu na swoju skupinsku jězbu jutře, sobotu, do rudnohorinskeho Seiffena. Bus wotjědźe w 7.30 hodź. wot busoweho zastanišća. W Seiffenje wobhladaja sej wulětnikarjo mjez druhim rudnohorinski muzej a tamnišu cyrkej.
Modla so kadiš
Budyšin. Na lětuše modlenje kadiša k wopominanju zamordowaneje Budyskeje židowskeje wosady přeproša Hans-Eberhard Kaulfürst njedźelu, 6. septembra, w 17 hodź. na Budyske židowske pohrjebnišćo při Mužakowskej dróze. Mužojo njech staja sej čapku.
Do centruma pohladnyć
Wojerecy. Po dźensnišim oficialnym wotewrjenju noweho Wojerowskeho wobydlerskeho centruma Piwarska 1 změja tam jutře a njedźelu dźeń wotewrjenych duri. Stajnje wot 11 hodź. móža sej zajimcy dom při staroměšćanskim torhošću wobhladać a so wo najwšelakorišich móžnosćach wobhonić, kotrež tam wužiwarjo wotnětka maja. W tymle domje běchu 13. oktobra 1912 Domowinu załožili, wo čimž swědči wopomnjenska tafle při zachodźe.
Zahrody přistupne
