W Madźarskej hrozy jastwo za ilegalny přestup hranicy
Brüssel/Berlin/Budapest (dpa/SN/K). Kriza ćěkancow dla politikarjow runjewon honi. Wčera běchu so nutřkowni ministrojo krajow Europskeje unije wurjadnje schadźowali, zo bychu wuradźowali, kak 160 000 migrantow rozdźělić. Po zeńdźenju němski nutřkowny minister Thomas de Maizière (CDU) rjekny, zo docpě so jeno „zasadne dojednanje“ a zo so na přichodnym schadźowanju 8. oktobra dale wo tym jedna. Přećiwo zawjazowacej kwoće, kajkuž komisija EU namjetuje, wobaraja so hłownje wuchodoeuropske čłonske staty Čěska, Słowakska, Pólska a Madźarska, kotrež mjenuje de Maizière „njesolidarnu mjeńšinu“. Dojednali su so wčera wo wěstych pochadnych krajach a wo čakanskich pasmach za ćěkancow z Grjekskeje.
