Wjeršk 21. čitanskeje turneje LND so prěni raz popołdnju wotměje
Spale (SN/CoR). Druhi tydźeń čitanska turneja Ludoweho nakładnistwa Domowina mjeztym traje. Dotal su čitarjo tradicionalny nazymski poskitk serbskeho nakładnistwa derje přiwzali a so tohorunja z awtorami rozmołwjeli. Tři zarjadowanja su hižo nimo, dalše dźewjeć sćěhuje. Wjeršk 21. čitanskeje turneje budźe, kaž je z wašnjom, literarna kermuša 4. oktobra. Přeco w hinašim kóncu Łužicy so wotměwaca budźe wona lětsa w Spalach. Jako partner je sej LND tamnišu Domowinsku skupinu zdobyło. Za hižo dawno eksistowace koło za serbstwo so angažowacych je to premjera – nic pak bjez předstawizny, kaž čłonka Spalowskeje Domowinskeje skupiny Sylwija Pinkowa powěda: „Běchmy na čitanju Kathariny Eliny wo němsko-serbskich předsudkach. Mějachmy čiłu rozmołwu z awtorku wo tym, zo je poćah mjez narodomaj w našej ewangelskej a wot industrializacije bóle potrjechenej kónčinje tróšku hinaši hač w katolskich Serbach. Poprawom smy temu dale plesć chcyli, a tak smy kedźbnosć nakładnistwa zbudźili.
