Hižo druhi raz wotmě so w Chołmje (Kollm) při Kwětanečanskim spjatym jězoru serbski ewangelski kónc tydźenja. Wosebje młode swójby zwonka Łužicy wužiwachu składnosć, tworić sej z dźěćimi nachwilny serbskorěčny rum.
Chołm (LM/SN). Kónc tydźenja přihotowali běchu fararka Jadwiga Malinkowa ze Slepoho, Christiana Piniekowa z Choćebuza a Maria Pěčkec ze Slepoho, kotraž přewza dźěło z dźěćimi. Pod jeje nawodom nazwučowachu dźěći mjez druhim bajku wo sydom kózlatkach, kotruž njedźelu k zakónčenju zetkanja předstajichu. Dorosćeni rozestajachu so z bibliskej temu „W cuzbje“. Prašenja, hdy a hdźe sym w cuzbje abo čuju so cuzy, stejachu w srjedźišću zhromadneho rozmyslowanja. Nimo toho zhonichu wobdźělnicy tež wšelake zajimawostki ze serbskich stawiznow Chołma. Hišće kónc 19. lětstotka bě połojca wobydlerjow tamnišeje wokoliny serbska. Najsławniši Serb Chołmjanskeje wosady je bjezdwěla duchowny Jurij Matej (1652–1732), kiž přełožowaše wšelake nabožne spisy do serbšćiny a zdźěła jednu z prěnich serbskich gramatikow.