Načasna zabawa z historiskim pozadkom

štwórtk, 29. oktobera 2015
artikl hódnoćić
(0 )
K projektnej skupinje Rapaki, kotraž je nowu kompjuterowu hru zhotowiła słušeja Jörg Hübner, Daniel Zoba, Jan Bjeńš, Šćěpan Hanuš, Michał Cyž (na wobrazu wotlěwa) a István Kobjela, kiž na fotowym terminje pódla njebě. Foto: SN/Maćij Bulank K projektnej skupinje Rapaki, kotraž je nowu kompjuterowu hru zhotowiła słušeja Jörg Hübner, Daniel Zoba, Jan Bjeńš, Šćěpan Hanuš, Michał Cyž (na wobrazu wotlěwa) a István Kobjela, kiž na fotowym terminje pódla njebě. Foto: SN/Maćij Bulank

Budyšin (SN/JK). Hišće maće chwile, sej hodowne dary wobstarać. Wot dźensnišeho pak maće dalšu móžnosć, sej sami přeće spjelnić abo druhim z darom wjeselo wobradźić.

Nowa kompjuterowa hra „Krabat a potajnstwo serbskeho krala“ dožiwi dźensa popołdnju swoju zjawnu premjeru. Šulerjo Serbskeho gymnazija Budyšin mějachu jako prěni składnosć, ju wuspytać. Projektowa skupina RAPAKI je po lětach­ intensiwneho dźěła po prěnjej serbskej kompjuterowej hrě z lěta 2001 „Krabat je so nawróćił“ načasnu hru za kompjuter a zdobom za mobilne nastroje wuwiła.

Pod cyłkownym nawodom Jörga Hübnera su programěrarjej Jan Bjeńš a Dani­el Zoba kaž tež grafikar Šćěpan Hanuš hru z načasnym narokom a wuhotowanjom na nohi stajili. To wšo skulojćiło je dźěło Michała Cyža, kiž je so wo nahrawanje a wobdźěłanje zwuka postarał, a Istvána Kobjele, kiž nańdźe přijomnu hudźbu za hru. W Budyskim studiju Sakskeho wukubłanskeho a wupruwowanskeho kanala (SAEK) su cyle nowu stawiznu wo łužiskim kuzłarju Krabaće do­zhotowili. Z ruku rysowane dyrdomdejstwa, kotrež wjedu po historiskich po­dawiznach we Łu­žicy, su z hudźbu podkładźene. Nimale 60 rěčnikow spožča akteram zajimawe a napjate hłosy. Nimo aktiwneho přinoška zmóžnjeja tež dobrowólni pomocnicy jónkrótny flair a wobsah. Nowostka wotpowěduje tak načasnym žadanjam na kompjuterowu hru. CD je w normalnej wersiji za 19,90 eurow­ na předań, wosebita edicija z tobołku płaći 29,90 eurow. Dóstanjeće ju w Smolerjec kniharni a Serbskej kulturnej informaciji w Budy­šinje kaž tež w Choćebuskej kulturnej infor­maciji Lodka.

wozjewjene w: Kultura
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND