Delegacija wjace hač 40 Serbow – spěwarjo muskeho chóra Delany z mandźelskimi – poby zawčerawšim, sobotu, na běłorusko-serbskej kermuši w Berlinje. Nastork k zetkanju dał bě Aleksej Žbanow, pósłanstwowy rada a přećel Serbow.
Berlin (KřK/SN). Jako prěnje wobhladachu sej Delenjo z busa zajimawostki stolicy, kotrež rozłoži jim Cyril Pjech, emeritowany farar a předsyda skupiny Berlinskich Serbow. Popołdnju podachu so k sociokulturnemu centrumej „Ratz-Fatz“ do Treptowa. Připowědźena bě kermušna bjesada ze zhromadnym spěwanjom, raz z běłoruskeje, raz ze serbskeje strony. Před zachodom witaše Serbow wabjenje trochu hinašeho razu: „Belorussischer und sorbischer Liederabend“ z běłoruskim kwasom a blinami, k tomu reklama w interneće z motiwami serbskeje narodneje drasty, přewzata wot listowych znamkow z NDRskeho časa. Do kulturneje rumnosće zetkawanskeho centruma, normalnje za 30 do 40 ludźi mysleneje, dyrbjachu cyłkownje 80 zajimcow zaměstnić.