Lajska dźiwadłowa skupina Šunow-Konjecy nowy kruch předstajiła

Šunow (bl/SN). „Wumrěć njedawa, ćeta“ je nowa inscenacija lajskeje dźiwadłoweje skupiny Šunow-Konjecy, kotraž je sobotu wječor w Šunowje premjeru swjećiła. Syły wćipnych, přećelow a přiwuznych běchu do Fabrikskeje hospody při­šli. „Wšitke městna běchu wobsadźene, kartki tuž wupředate“, rjekny organizatoriski nawoda skupiny Daniel Wjenk.

Nalada na žurli běše hižo do předstajenja rozwólna, napjatosć přihladowarjow kaž tež dźiwadźelnikow wot mjeńšiny k mjeńšinje stupaše. Swěca na žurli so hasny, na jewišću so wona zaswěći, hudźba zaklinča a prěni wobraz so pokaza.