Zabawne popołdnjo na nazymskim koncerće w Bukecach

Bukecy (JKr/SN). Zo lubi nazymski koncert w Bukecach dobru bjesadu a zabawu, je mjeztym tež zwonka narańšich Serbow znate. A tak přichwata wčera popołdnju­ najebać pancate a wichorojte wjedro něhdźe 70 hosći nic jenož ze wsow wokoło Bukec, ale tež z Kubšic a Barta do Bukečanskeje wjesneje hospody. Po zwučenym wašnju móžeše so tež lětsa Załožba za serbski lud jako zarjadowarka­ nazymskich koncertow na Bukečanske­ kulturu spěchowace towarstwo spušćeć. Jeho čłonojo běchu wšitko za rjane popołdnjo při šalce kofeja a skibce tykanca přihotowali. Składnosć zhromadneje bjesady do poprawneho započatka koncerta wuži tójšto ludźi.