Budyski Serbski muzej dźěła dale na nowych konturach
Budyšin (SN/CoR). Negatiwny turistiski trend w Sakskej so tež na Budyski Serbski muzej wuskutkuje. Tak su lětsa dotal jenož 10 615 hosći (staw 6. decembra) witać móhli. „Přerěznje mějachmy w minjenych lětach přeco 12 000 wopytowarjow, lětsa trochu mjenje. Budyšin a cyła Sakska měještej mjenje přenocowanjow. To je cyłkowny trend, kotryž so tež w kulturnych zawodach wotbłyšćuje“, rozłožuje nawodnica muzeja Christina Boguszowa. Poskitkow bě lětsa dosć – dohromady su 49 swójskich zarjadowanjow přewjedli (bjez wodźenjow) a publikumej štyri wosebite wustajeńcy pokazali. Běchu to přehladce wo Kašubach a jutrownych nałožkach w Europje, Karla Voukowa „Satkula“ kaž tež prezentacija nowonakupjenych twórbow tworjaceho wuměłstwa. „Nam pak lětsa klasiska kubłansko-wobydlerska klientel wotwonka pobrachuje, kotraž hewak kónc tydźenja muzej pjelni. Samsny problem maja tež Statne wuměłstwowe zběrki w Drježdźanach“, direktorka podšmórnje.