Składnostnje 500 lět reformacije spěchuje Zwjazk klětu pjeć projektow

Zhorjelc/Budyšin (SN/CoR). W lěće 2017 zhladujemy na 500 lět reformacije. Kulturny rum Hornja Łužica-Delnja Šleska je w tym zwisku projekt „Mjezwoča reformacije w Hornjej Łužicy, Čěskej a Šleskej“ z dohromady 17 naprawami iniciěrował, kotrež Zwjazk z wosebitym spěchowanskim programom k jubilejej reformacije podpěruje. Wot lěta 2012 je mjeztym 15 předewzaćow zwoprawdźenych, dohromady 208 000 eurow je Zwjazk regionej za to přewostajił. Za lěto 2016 je 49 185 eurow za pjeć jednotliwych projektow přizwolenych, jedyn z nich je serbski. „Wjeselimy so, zo nas statna ministerka za kulturu a medije Monika Grütters (CDU) znowa podpěruje. Projekty pokazuja, kelko kulturneje wšelakorosće kónčina skići a kotre nazhonjenja we wobchadźenju ze swobodu a tolerancu móžemy dźensa wužiwać“, zwurazni sekretar kulturneho ruma Joachim Mühle.