23. decembra 2015 woswjeći hudźbna pedagogowka dr. Magadalene Kemlein w Drježdźanach 85. narodniny. Čłowjek njeby wěrił, zo je hižo tajku wysoku starobu docpěła, wšako – hdyž jej to strowota dowola – přeco hišće so wobdźěla z woporniwosću na seminarach, z radosću sćěhuje koncerty a popomha měrnje a skedźbliwje z dobrej radu.
Magdalene Kemlein narodźi so 1930 a wotrosće jako najmłódše dźěćo lěkarskeje a hudźbu lubowaceje swójby w Drježdźanach. Hižo w dźěćatstwje spózna, kak zamóže chorym pomhać nimo mediciny tež hudźba. Jako dwanaćelětna sydaše prawidłownje w dźěćacym sanatoriju za křidłom a spěwaše z pacientami. Tam nawukny, zo hudźba, rytmika, pohib a klawěrna improwizacija hromadźe słušeja. Wot lěta 1949 studowaše we Weimarje šulsku hudźbu, mjez druhim pola klawěrneje profesorki a prawnučki Antonína Dvořáka, knjenje Juliany Lerche. Dokelž měješe telko praktiskich nazhonjenjow, smědźeše hižo wot druheho studijneho lěta komilitonow wuwučować. Wjeršk jeje wukubłanja bě směrodajna promocija „Improwizacija w tučasnych formach a jako srědk šulskeje hudźby“.