Hódnoćenje a zhladowanje do přichoda tradicionalneho Swjedźenja serbskeje poezije
Swjedźenje serbskeje poezije Zwjazka serbskich wuměłcow (ZSW) słušeja k tradicionalnym wuznamnym kulturnym podawkam w Serbach. Swój spočatk mějachu 1979 na Wotrowskim hrodźišću, na kotrymž běštaj nimo serbskich literatow mjez druhim tež čěski a ukrainski basnik Josef Suchý a Wolodymyr Lučuk prěnjej wukrajnaj hosćej. Ideju za kulturny swjatk we Łužicy bě tehdy Benedikt Dyrlich z kóždolětneho mjezynarodneho Puškinoweho swjedźenja w Michalowskoje pola Moskwy do Łužicy přinjesł.
Loni, krótko do hód, je so skupina ZSW zetkała, zo by wo přichodźe swjatka poezije rozmyslowała a prěnje mysle za nowe formy kulturneho podawka zezběrała. Bywši předsyda zwjazka a nětčiši předsyda Koła serbskich spisowaćelow we wobłuku ZSW Benedikt Dyrlich bě hižo do toho signalizował, zo po dotal organizowanych swjedźenjach lětsa za wosomatřicety jako nawoda k dispoziciji njebudźe. Předsydstwo ZSW jednohłósnje rozsudźi, tradiciji „njewusnyć dać“, ale snano na druhe wašnje přewjesć.