Serbski institut dźiwa na dobru měšeńcu sobudźěłaćerjow

Budyšin (SN/CoR). Designowany nowy nawoda Serbskeje centralneje biblioteki a Serbskeho kulturneho archiwa je Wito Bejmak. Tole wobkrući na naprašowanje SN jednaćelski zastupjer direktora Serbskeho instituta dr. Hauke Bartels.

Organizatorisku jednotu bilioteka/archiw ma diplomowy informatikar, po tym zo so wjelelětny nawoda dr. Franc Šěn kónc apryla na wuměnk rozžohnuje, wot meje nawjedować. Hižo wot januara dźěła Bejmak dźělnočasowje na poł městnje w instituće. Wón přihotuje koncept za nowu digitalnu infrastrukturu slědźenišća a móže so zdobom do noweho wobłuka zadźěłać. „Nawod biblioteki a archiwa je jara naročny nadawk, wosebje w času, hdyž dyrbimy wobłuk přeorganizować. Zaměr je, digitalnu biblioteku za slědźenje wuwiwać – a to nima jenož nawoda zmištrować, ale wšitcy“, dr. Bartels rozłožuje, „pola nas w instituće nimamy nikoho, kiž ma nazhonjenja z digitalnym přestajenjom.“