SLA reaguje na přeća přihladowarjow

Budyšin (SN/CoR). Z lětušim ptačokwasnym programom „Kak dźiwnje swět so wobroća“ reaguje Serbski ludowy ansambl tež na wothłós publikuma. „Wuhódnoćejo wot přihladowarjow wupjelnjene naprašniki smy zwěsćili, zo přeja sej woni wjace folklory a brašku na ptačim kwasu“, praji awtorka lětušeho libreta a dramaturgowka SLA Jěwa-Marja Čornakec wčera na nowinarskej konferency. Nastork k programej bě jej přinošk „Sulšečanska młodźina na přaznym kwasu“, wozjewjeny 3. februara 1956 w Nowej dobje. „W 50tych lětach bě w Kulowskej kónčinje hišće z wašnjom, na kóncu přazneho časa a pjerjodrěća z wulkim gawdijom tradicionalny kwas na hłowu stajić. Smy tuž serbski nałožk wožiwili a z toho program wuwili“, Čornakec rozłožuje.