Dotal njeje policija maskěrowanych skućićelow wuslědźiła, kotřiž běchu w septembrje a oktobrje 2014 serbskich młodostnych w Šunowje a druhdźe na rejach nadběhowali.
Budyšin (SN/mwe). Z naprašowanja Serbskich Nowin na Zhorjelsku policajsku direkciju wuchadźa, zo njejsu zastojnicy dotal nikoho z tych lepili, kotřiž běchu w zašłosći serbskim młodostnym z bijeńcu hrozyli, jich z wudmami zranili, serbske napisy na wjesnych taflach w Ralbicach a druhdźe přemórali a před hižo dlěšim časom w katolskich Serbach křiže wonječesćili.
