Němski karnewalowy wóz razne reakcije w susodnym kraju zbudźił

Waršawa. Karnewalowy wóz Düsseldorfskeho póstniskeho towarstwa, kotryž tematizuje nowe politiske wobstejnosće w Pólskej, je předewšěm w konserwatiwnych medijach susodneho kraja razne reakcije zbudźił. Gazeta Polska na přikład wěnuje wozej samo wulki titulny foto na prěnjej stronje. Pod nadpismom „Karnewal antipólskeje propagandy“ je widźeć předsyda strony Prawo a sprawnosć Jarosław Kaczyński w uniformje wojerskeho diktatora, kotryž čwěluje ze škórnjom žonu w barbach Pólskeje. „Pólsku zwobraznić, jako by stała pod škórnjom Kaczyńskeho, je skandalozne“ měni internetny portal Prosto z Mostu.

Před dnjemi je tež pólski wonkowny minister Witold Waszczykowski reagował. „Chcemy na diplomatiske wašnje na to skedźbnić a so našich partnerow w Berlinje prašeć, komu tole słuži“, rjekny Waszczykowski wutoru w pólskim rozhłosu. Politikar, kiž přisłuša kaž Kaczyński narodnokonserwatiwnej stronje Prawo a sprawnosć (PiS), ma motiw za „hanjenje Pólskeje a jeje politikarjow“.