Karlsruhe (SN/at). Na zhromadnym sympoziju stej Zwjazkowe sudnistwo (BGH) a Centralna rada Sintow a Romow wčera w Karlsruhe njeprawdu tematizowałoj, kotruž bě najwyše sudnistwo zwjazkoweje republiki etniskej mjeńšinje w powójnskim času načiniło. W zasadnym wusudźe ze 7. januara 1956 bě BGH wotpokazało, wot nacionalsocialistow přesćěhanych Sintow a Romow za nućene přesydlenje wotškódnić, a bě zwěsćiło, zo mějachu nacionalsocialisća „cyganow“ z prawom za „družinocuzych“ (artfremd). „Tak bě BGH na zakładźe komentarow nacijow na přikład wuwjedło, zo, njewobmjezowany okupaciski nahon cyganow kaž primitiwnych pračłowjekow charakterizuje‘.“ Takle rěka w nowinskej zdźělence centralneje rady. Mnozy z te­hdy wobdźělenych sudnikow běchu hižo w nacistiskej Němskej sudźili a su po Druhej swětowej wójnje do juristiskeje słužby młodeje republiki přešli.