Bukečanska Bjesada a Serbske ewangelske towarstwo běštej na dźěłarničku za Bjesady sobotu do Bukec přeprosyłoj. Skoro 40 zajimcow wšěch generacijow je přeprošenje sćěhowało, mjez nimi napadnje wjele dźěći.

Bukecy (lm/SN). W rumnosćach Ewangelskeje srjedźneje šule w Bukecach zesydachu so hosćo z Hodźija, Rakec, Horow, Budyšina, Bukec a wokoliny do šulskich ławkow. Z nutrnosću a zhromadnym kěrlušom superintendent Jan Malink popołdnjo zahaji. Na to předstajištaj Daniel Zoba a Michał Cyž kompjuterowu hru „Krabat abo potajnstwo serbskeho krala“. Informacije wo šěsć lět trajacym wuwiću a nahrawanju 80 figurow z 50 rěčnikami připosłucharjow jimachu. Dźěći mjeztym hižo w druhej rumnosći hru wuspytachu. Starša generacija poda so pod nawodom Měraneje Cušcyneje na slědy Krabata w literaturje a pohłubši swoje rěčne znajomosće w čiłej konwersaciji.