Hornjołužiske nakładnistwa hotuja so na lětuše knižne wiki

Budyšin (SN/CoR). Tydźeń do zahajenja Lipšćanskich knižnych wikow, wotměwacych so wot 17. do 20. měrca, su hornjołužiske nakładnistwa dźens dopołdnja. na 13. zhromadnej nowinarskej konferency w Budyskim NSLDź rozłožili, z kotrymi knihami chcedźa so na prěnim lětušim wjeršku literarneho žiwjenja předstajić. Do toho poda jednaćelka Ludo­weho nakładnistwa Domowina Marka Maćijowa pod hesłom „Je Gutenberg hišće aktualny?“ kompaktny dohlad do tuchwilneho zwiska ludźi ke kniham, a to wosebje hladajo na poměr digitalnych a ćišćanych wudźěłkow w nakładnistwach. Tak zwěsći studija bursoweho towarstwa němskeho knihikupstwa, zo 80 procentow wobydlerstwa knihi čita a wjetšina chce ćišćanu knihu měć – mjeztym zaso wjace. Wobrot e-bookow wučinješe loni 4,5 procentow a je jenož mało přiběrał. W LND je podźěl digitalnych knihow z mjenje hač 2,5 procentami hišće tróšku mjeńši. Jasny facit Marki Maćijoweje tuž rěka: „Nowe medije ćišćanu knihu njewutłóča.“