Kito Lorenc z Wuježka pod Čornobohom, kiž w němskej kaž serbskej rěči basni, je lawreat 13. myta Christiana Wagnera. Tole wozjewi wčera Christiana Wagnerowa towaršnosć w badensko-württembergskim Leonbergu.

Leonberg (SN/at). Ze spožčenjom Myta Christiana Wagnera wuznamjeni towaršnosć ze samsnym mjenom 78lětneho Lorenca za jeho cyłkowne lyriske tworjenje. „Jeho basnje wotkrywaja swoju subwersiwnu rjanosć mjez chutnym, dokładnym zaznawanjom swěta a samo­refleksiwnej žortniwosću rěče“, rěka we wopodstatnjenju pjećwosoboweje jury. „W duchu Christiana Wagnera su Lorencowe basnje historisce indiwiduelne, dokelž bjeru swoje temy, swoje maćizny a swoju rěč z teje kónčiny, z kotrejež basnik pochadźa a hdźež wón by­dli.“ Jury skedźbnja runje tak na dwurěčne basnjenje: „Lorenc je w serbsko-němskej prowincy dwurěčny poetiski skutk tworił, kotryž sej zasłuža pod swětoliterarnym aspektom zas a zaso mjenowany być.“