Za Běłowodźanskeho tworjaceho wuměłca a čłona ZSW Eberharda Petersa bě to wčera wječor wozbožacy wokomik: W twarjenju Sakskeho wyšeho zarjadniskeho sudnistwa na Budyskim hrodźe dožiwi wón mjez wjace hač 60 wopytowarjemi wotewrjenje wustajeńcy swojich twórbow.

Budyšin (AW/SN). „Tale prezentacija je za nas něšto nowe a zdobom wosebite, dokelž wuhotowachmy tajku scyła prěni króć zhromadnje ze Zwjazkom serbskich wuměłcow a Serbskim muzejom“, zwurazni na witanju wiceprezident sudnistwa dr. Matthias Grünberg. „To wučinja dobre susodstwo z našim zarjadnišćom“, reagowaše na to nawodnica Budyskeho Serbskeho muzeja Christina Boguszowa. Tež čłon předsydstwa ZSW Tomasz Nawka přitomnych serbsce a němsce powita. Wón přednjese baseń Bertolta Brechta „700 Intellektuelle beten einen Öltank an“. Při tym poćahowaše so na wobrazy a wuměłske objekty Petersa, zwuraznjace protest přećiwo ničenju łužiskeje krajiny.