Póstny čas zdobom jako žarowanski čas

štwórtk, 24. měrca 2016
artikl hódnoćić
(0 )

Serbski ludowy ansambl je swój koncertny serial Musica sacra tež lětsa wuspěšnje dale wjedł. Na třoch wšelakich městnach poskići wón program za póstny čas, a to w Ochranowje, w cyrkwi Budyskeho­ jastwa a 5. póstnu njedźelu w Baćońskej cyrkwi.

Z wobšěrneho sakralneho tworićelstwa najsławnišeho kan­tora Lipšćanskeje Tomašoweje cyrkwje a mištra barokoweje doby Johanna Sebastiana Bacha zaklinčachu w Baćonju z jeho wobšěrnych kompozicijow z póstnej a pasionskej tematiku někotre arije. Znowa so tu wo­pokaza, zo zamóže tale hudźba tež dźensniše připosłucharstwo dale jimać, je-li za to wotewrjene.

Pod dosć hłubokim zaćišćom pak stejachu tež tamne poskitki, a to wobsahowje wšelako zapołožene twórby z pjera serbskich komponistow. Njeběchu pak to kompozicije, kotrež su jeničce na tónle cyrkwinski róčny čas wjazane. Wot Jana Bulanka steješe z „Jehnjom Božim“ wurězk z jeho „Missy sorabica“ na programje. Z jaskrawym zhudźbnjenjom basnje Rainera Marije Rilki „Wulkotna je smjerć“ přez Jana Pawoła­ Nagela spo­srědkowa so jara specielny wid na tónle posledni podawk w našim zemskim žiwjenju­. K tomu poda so kaž wothłós Nagelowe­ popularne skomponowanje modlitwy „Strowa sy, Marija“. Jara swjatočnje skutkowaše w tym zwisku tež přez smyčkarjow podata meditatiwna „Melodija“ Detlefa Kobjele.

Wulki kruh hač k bórzomnej jutrowničce sćahny orchester SLA na kóncu ze „Sinfoniju w e-moll“ Josepha Haydna, kotraž dósta swojeje motiwiki dla přiznamjo „žarowanska sinfonija“. Bolostny wukřik twori dźě hižo spočatk kompozicije wulkeje hudźbneje formy, a žarowanska atmosfera rozlěhuje so stajnje znowa nad wšěmi štyrjomi sadźbami, doniž so lemjacy šlewjer patetiki skónčnje łahodnje njezběhnje.

Ze Serbskim komornym orchestrom, Lianu Bertók při pišćelach a spěwnymi solistami Elmiru Yakhinu (sopran), Miru Szary (mecosopran), Mikołajom Walerychom (tenor) a Jae-Hungom Cho (bariton) kaž tež dirigentom Gabriele Donà poskići SLA tak zaso jónu koncert nabožnje zapołoženeje hudźby, kotryž smě so nadobny mjenować. Chrysta Meškankowa

wozjewjene w: Kultura
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND