W haperleji smy z Rozhladom tematisce předewšěm we Łužicy po puću, w někotrych přinoškach hladamy pak tež za mjezy Łužicy. Na wobalkowu twórbu młodeje zapadofriziskeje wuměłče Niny Peckelsen nawjazujo rozłožuje Susanne Hozyna, kotry zwisk maja kóčki z chodojtami.

Mysle k Protyce a Pratyji podawatej Rejza Šěnowa a Franciska Šulcojc, mjeztym zo wěnuje so Petr Kalina monografiji Theresy Jacobs wo serbskej ludowej reji.

Hudźby dótka so wurězk pólskeho romana „Objawienie“ spisowaćelki Haliny Barań, kotraž je jón serbskemu komponistej Korli Awgustej Kocorej wěnowała. Jako wuhlad na nowu zběrku Kita Lorencowych basnjow „Zymny kut“ wozjewjamy jeho baseń „Žehliwe pismo“.

Kelko stawizniskeje wěrnosće tči za legendomaj wo započatkach putniskeho městna Róžanta, zhoniće wot Pawoła Roty. Wón wěnuje so kritisce mjez druhim dokładam za Sernjanskeho zemjana, kiž bě drje zjewjenje žónskeje postawy při lěhwje wójska Korle Wulkeho a blisko dźensnišeho Róžanta widźał.