Budyšin (SN/CoR). Zo je duchowne wonjerodźenje fenomen, kotryž so w towaršnostnych elitach runje tak jewi kaž w najnišich socialnych worštach, je wuchadźišćo krucha „Makojčka“ Hamburgskeje awtorki Jany Voosen. Zo drogi žadyn wupuć njejsu, ale ke katastrofje wjedu, kotrejž tež młoda lubosć zadźěwać njezamóže, to předstajištaj wčera jara přeswědčiwje elewaj činohrajneho studija NSLDź Juliana Gruhnec a Richard Nowak na premjerje w Budyskim Dźiwadle na hrodźe. Lubina Hajduk-Veljkovićowa bě hru do čiłeje serbšćiny přenjesła. Režiju měješe nawoda studija Torsten Schlosser.