Chasow běše nam wosebite zapřijeće! Wottam pochadźeše naša Hantušec wowka a tam bydleštej jeje staršej sotře Marja a Hańža. Marja Kubašec běše moja Chasowska kmótra a Hańža Thielmannowa naša kmótra lěkarka, dokelž bě kmótřiła našemu nanej a mojej sotře Ludmili.

Do Chasowa sym běhała, z rolerom sej pěši puć po horje dele skrótšała, sym tam z kolesom, mopedom a na kóncu z Trabantom jězdźiła. Tam přebywach jako dźěćo, šulerka, młodostna a dorosćena – jako mać móžach Chasowskej kmótře samo jeje praprasotrowca předstajić.

Kóždy wopyt pola kmótry měješe někajki wosebity powabk: Hač běchu to polcy połne knihow, dobra słódkosć, kupny napoj, zhromadna hra, wosebje pak přec zajimawa bjesada.

A hižo zahe pytnych, kajke zbožo mějach, zo běštaj staršej nanowu ćetu Marju Kubašec – tehdy 59lětnu – za moju kmótru prosyłoj.