Wojerecy (SN/CoR). Štyri dny do zahajenskeho koncerta 51. Wojerowskich hudźbnych dnjow přichodnu njedźelu w tamnišej „Łužiskej hali“ su něhdźe tři štwórćiny zastupnych lisćikow hižo předate. To wězo wjelelětnu organizatorku Carmen Hoffmann wjeseli: „Smy pozitiwnje překwapjeni, zo je telko kartkow hižo wotbytych. To wo tym swědči, zo so naš lětuši poskitk ludźom spodoba.“ Hižo wupředatej stej koncertaj z mjezynarodnymi wuměłcami kaž su to pianist Louis Schwizgebel, Avi Avital na mandolinje a Mahan Esfahani na cembalu. Zbywace lisćiki su hišće za klezmerowu hudźbu z klarinetistom Gioru Feidmannom a organistom Matthiasom Eisenbergom 3. meje w Janskej cyrkwi. Koncert pod hesłom „Wosebity instrument – ze škleńcy“ 1. meje dyrbjachu wulkeho wothłosa dla do hrodoweje žurle přepołožić. Dohromady wabi jědnaće zarjadowanjow hač do 8. meje do Wojerec.