Wopomnjenske zarjadowanje
Choćebuz. Sobotu spominaja w Choćebuzu na serbskeho fararja Herberta Nowaka składnostnje jeho stotych posmjertnych narodnin. W 14 hodź. je spominanska swjatočnosć při jeho rowje na južnym kěrchowje w Choćebuzu. Krótke prědowanje dźerži serbski dušepastyr Ingolf Kśeńka. Wot 15 hodź. je w klubowni Delnjoserbskeho internata kofejpiće, hdźež so Christina Kliemowa a Pětš Janaš ze swójskimi dožiwjenjemi na njeho dopominataj. Na zarjadowanje přeprošujetej Spěchowanske towarstwo za serbsku rěč w cyrkwi a Kupka serbska namša.
Swjedźeń na dworje
Ćisk. Ćiskowske kulturne towarstwo přeprošuje zajimcow jutře, 23. apryla, wot 11 do 17 hodź. na nalětni swjedźeń na Ćiskowski Statok. Wjeselić móža so hosćo mjez druhim na wustup Ćiskowskeje serbskeje ludoweje rejwanskeje skupiny. Poskićeć budu tam kwětki a zelowe rostliny. Tež na wikach z ratarskimi nastrojemi, domjacnostnymi artiklemi, hrajkami abo knihami budźe za kóždeho něšto pódla. Přihotowali su tež za dźěći a młodostnych wosebite wiki. Ćělne zastaranje je zawěsćene.
