NSLDź a SLA wotměnjawy literarno-hudźbny wječor wuhotowałoj
Budyšin (SN/CoR). K 100. posmjertnym narodninam Jurja Brězana 9. junija bě Němsko-Serbske ludowe dźiwadło wčera zhromadnje ze Serbskim ludowym ansamblom na swjedźenske zarjadowanje pod hesłom „Ze Studnje jeho lět“ do Budyskeho Dźiwadła na hrodźe přeprosyło. Wothłós bě tak wulki, zo dyrbjachu stólcy přistajeć. Něhdźe 130 wopytowarjow, mjez nimi zapósłanča zwazkoweho sejma Caren Lay (Lěwica) a Budyski financny měšćanosta Robert Böhmer, dožiwi literarno-hudźbny wječor. Na nim čitachu prapremjernje z Brězanoweje poslednjeje hry „Gen. Genesis. Nemesis“. Běchu tam tohorunja Brězanowi wnučkaj a wnučka Beno, Franciska a Florian. Wustajeńca plakatow k dźiwadłowym inscenacijam Brězana kaž tež wideja z nim skulojćichu spominanje na drje najznaćišeho serbskeho spisowaćela.
