70. serbski ewangelski cyrkwinski dźeń w Slepom so wotměł
Slepo (SN/MkWj). Z wjacorymi zarjadowanjemi swjećachu ewangelscy Serbja a dalši zajimcy kónc tydźenja w Slepom jubilejny 70. serbski ewangelski cyrkwinski dźeń, kotryž steješe lětsa pod hesłom „Woni pak wostachu wobstajni“. Jedyn z wjerškow – wčerawše wulke kemše w Slepjanskej cyrkwi – je spěwna skupina Kólesko pod nawodom Geralda Schöna dostojnje wobrubiła. Kemše swjećachu serbski superintendent Jan Malink z Budyšina, Slepjanska fararka Jadwiga Malinkowa a Hodźijski farar Christoph Rummel.