Krótkopowěsće (24.05.17)

srjeda, 24. meje 2017
artikl hódnoćić
(0 )

Prapremjera na cyrkwinskim dnju

Berlin. We wobłuku Němskeho ewangelskeho cyrkwinskeho dnja dožiwi kruch komponista Sebastiana Elikowskeho-Winklera „rěč a wěra 2“ swoju prapremjeru jutře na koncerće „Sichtungen“ w Berlinskej cyrkwi swj. Hilžbjety. Prěni dźěl na Jana Kilianowy choral „Zbudźenje za Serbow“ poćahowaceje so kompozicije měješe prapremjeru na wosebitym koncerće spočatk lěta.

Witaja noworjadowanje

Njebjelčicy. Iniciatiwa Serbski sejm wot Sakskeho krajneho sejma wobzamknjenu změnu wysokošulskeho zakonja wuraznje wita. Nětko maja zajimcy ze serbskorěčnymi znajomosćemi spěšniši přistup k wučerskemu studijej. W nowinskej zdźělence žada sej iniciatiwa dalše konkretne kročele, kaž lěpše wuknjenske wuměnjenja­ na Lipšćanskej uniwersiće.

Domy bomby dla ewakuowali

Choćebuz. Po namakanju bomby z Druheje swětoweje wójny su dźensa něhdźe 1 000 wobydlerjow Choćebuza ewakuowali. Potrjechene bě tež nakładnistwowe twarjenje Lausitzer Rundschau, w kotrymž je redakcija tydźenika Nowy Casnik zaměstnjena. Bombu, kotruž běchu wčera při twarskich dźěłach našli, chcychu w běhu dnja znješkódnić.

Flick zaso do Hoffenheima

Hoffenheim. Hansi Flick, něhdyši sportowy direktor němskeje koparskeje wubranki DFB, stanje so z nowym jednaćelom zwjazkoweho ligista TSG 1899 Hoffenheim. 52lětny bě tam hižo wot lěta 2000 do 2005 trenar. Mustwo trenarja Juliana­ Nagelsmanna smě hišće wo městno w mišterskej lize hrać, za europsku ligu­ je hižo kwalifikowane.

Ostrzolek nětko w Hannoveru

Hannover. Postupnik do prěnjeje zwjazkoweje koparskeje ligi Hannover 96 je wonkowneho škitarja Matthiasa Ostrzoleka wot Hamburgskeho SV angažował. Za 26lětneho njetrjeba ničo zapłaćić. Ostrzolek je wčera zrěčenje hač do 2020 podpisał. W lěće 2014 bě wón wot FC Augsburga do Hamburga šoł a je tam w 89 hrach jedne wrota třělił.

wozjewjene w: Krótkopowěsće
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND