SJ Chrósćicy

– Drježdźany-Laubegast 4:3 (2:1)

Zestawa domjacych: Králíček – Dehn, Cyž, Hrdlitschka, Bětnar, Sentivan, Henčl, Bogusz (68. Runt), Zahrodnik, Věchet, Žur

Za Chróšćanskich koparjow bě do hry jasne, zo trjebaja dypki. Sylnje hrajacy nadběhowar Radim Věchet měješe w 15. min. prěnju dobru składnosć. Po róžku skoči kulowata koža k njemu, wrotar pak kop z nohu wotwobara. Někotre mjeńšiny pozdźišo měješe Věchet přichodnu šansu, a tu wón k nawjedowanju přetwori. Po nadběhu přez lěwu stronu bě jemu Feliks Zahrodnik preciznu flanku podał, a Věchet bul suwerenje do dołheho kuta zhłójčkowa. W 31. min. Chróšćenjo na 2:0 zwyšichu. Po dołhej třělwje přez Drježdźanski škit kopny hóstny wrotar zwonka jědnatki bul direktnje k Simonej Žurej. Tón spěšnje reagowaše a třěli bul do klětki. Běše to prěni króć w sezonje, zo Chróšćenjo w dypkowej hrě nawjedowachu. Krótko do połčasa pak dóstachu hosćo jědnatku, po tym zo bě Tom Henčl přećiwnika foulował. Pokutny kop bu suwerenje k 2:1 (45.) přetworjeny.