Słónco, módre njebjo a čerstwa nalětnja zeleń přewodźachu křižerjow jutrowničku w Hornjej Łužicy. Dohromady 1 598 křižerjow je w dźewjeć procesionach jutrowne poselstwo wozjewjało. Kaž Serbski rozhłós zwěsći, je to najmjeńša ličba wobdźělnikow minjenych 16 lět. Něhdźe 25 000 ludźi je po informacijach policije křižerjow widźało. Jutry – to pak běchu tež ewangelski zeleny štwórtk pola Patokec na Horach, jutrowne spěwanje we Wuježku, Čornym Chołmcu, Rownom a Janšojcach, błótowski jěchanski procesion po Cerkwičanskej wosadźe, ludowy swjedźeń na Budyskim Hrodźišku a delnjoserbske kemše wčera w Picnju.
Namołwa k měrej steji w srjedźišću jutrowneho poselstwa bamža Franciskusa. Namóc a wójna měłoj so zakónčić, tež na Ukrainje. To rjekny 78lětny swjaty wótc njedźelu před dźesaćitysacami putnikow na Pětrowym naměsće w Romje a chwaleše atomowe zrěčenje z Iranom. Poselstwo a žohnowanje „Urbi et Orbi“ běštej wjerškaj jutrownych swjatočnosćow we wěčnym měsće.