Před poł lětstotkom ze štyrjomi koncertami załožena njeje so tradicija Wojerowskich hudźbnych dnjow jenož hač do dźensnišeho wobchowała. Wona je so rozšěriła a poskići w jubilejnym lěće ze štyrnaće zarjadowanjemi hač do 10. róžownika wulku mnohotnosć.
Wojerecy (DoG/SN). Wyši měšćanosta Wojerec Stefan Skora (CDU) naspomni wčera w swojej narěči mnohich wulkotnych wuměłcow z kraja a wukraja, ale tež Wojerowskich młodych hudźbnikow, kotřiž su k tomu přinošowali, zo je so hudźbny swjedźeń na lětny podawk cyłeho regiona wuwił. Tak ma zakónčacy koncert Wojerowskeho sinfoniskeho orchestra přeco wysoki narok. Tež serbski koncert ma kóžde lěto swoje krute městno w programje.