Rozmołwa z dr. Theresu Jacobsowej wo jeje doktorskim dźěle
Loni je w Ludowym nakładnistwje wušła kniha 34lětneje dr. Theresy Jacobsoweje „Der Sorbische Volkstanz in Geschichten und Diskursen“. Disertacija Lipšćanki zaběra so ze serbskej ludowej reju. Theresa Jacobsowa tuchwilu jako swobodna sobudźěłaćerka na wšelakich rejwanskich projektach sobu skutkuje. Měrćin Wjenk je so składnostnje publikacije z rodźenej Budyšanku, kotraž z mandźelskim a dźěsćomaj w Lipsku bydli, wo jeje doktorskim dźěle a wo ludowej reji rozmołwjał.
Spočatnje wočakowach wot knihi wobšěrny přehlad a wopisanja rejow. Spěšnje pak spóznach, zo tomu tak njeje. Skerje wujasnjeja so poćahi, kotrychž sej wobkedźbowar často wědomy njeje: mjez institucijemi, kotrež so z rejemi zaběraja, a akterami, kotřiž rejuja. Sće so wotpohladnje za dekonstrukciju jako metodu rozsudźiła?